នៅវេលាទាបភ្លឺ ឈានចូលព្រឹកថ្ងៃទី ១៦ មិនា ក្លឹប Manchester United នឹងត្រូវបើកកីឡដ្ឋានស្វាគមន៍ក្លឹបអេស្ប៉ាញ Atletico Madrid ជាជំនួបជើងទី ២ វគ្គ ១៦ ក្រុមចុងក្រោយ Champions League មានផ្សាយផ្ទាល់លើទំព័រ CTS Sports។ តាមការបញ្ជាក់ជាមុន ពីលោក Ralf Rangnick ជាអ្នកចាត់ការ បានបង្ហើបថា សល់តែកីឡាករ Luke Shaw ម្នាក់ប៉ុណ្ណោះ ដែលមិនទាន់ប្រាកដប្រជា ថានឹងអាចចូលលេងឬអត់។
សម្រាប់ករណី Scott McTominay គេបានត្រលប់មកវិញហើយ ក្រោយជួបបញ្ហារបួស ខកខានការឈរជើងទល់ Spurs ថ្ងៃមុន រីឯ Bruno Fernandes ក៏តេស្តឃើញអវិជ្ជមាន ជាសះស្បើយពីជំងឺ COVID-19។ ករណីរបស់ខ្សែការពារស្លាប Shaw គេត្រលប់មកហ្វឹកហាត់ក៏ពិតមែន តែគ្រូបង្វឹកនៅចាំតាមដាននិងវាយតម្លៃសម្រេចសិន។
អ្នកចាត់ការសញ្ជាតិអាល្លឺម៉ង់ និយាយមុនប៉ះ At រាត្រីនេះ៖ “ពេលវេលានេះ យើងមានកីឡាករសឹងតែទាំងអស់ដែលអាចលេងនៅថ្ងៃស្អែក លើកលែងតែ Luke Shaw ម្នាក់ប៉ុណ្ណោះ ដ្បិតម្សិលមិញ គេហ្វឹកហាត់ តែយើងនៅរង់ចាំមើលគេសិន ថាគេអាចត្រៀមខ្លួនរួចរាល់ឬអត់”។
លោកបន្ត៖ “កីឡាករទាំងអស់ឯទៀត បានហ្វឹកហាត់ និងត្រៀមខ្លួនរួចរាល់ រីឯ Fernandes គេតេស្តឃើញអវិជ្ជមានតាំងពីថ្ងៃម្សិលមិញ ជាហេតុដែលគេមកចូលរួមហ្វឹកហាត់នៅថ្ងៃនេះជាមួយក្រុមទាំងមូល”៕
ប្រភព៖ Sportsmole