កាលពីប្រកួតជើងទី ១ នៅឯកីឡដ្ឋាន Wanda Metropolitano ក្លឹប Atletico Madrid លេងបានស្មើ ១-១ ទល់ក្លឹប Manchester United ដោយគ្រាប់បាល់កើតចេញពីកីឡាករវ័យក្មេង Joao Felix និង Anthony Elanga។ វិលចុះឡើង ការប្រកួតជើងទី ២ ជាវគ្គកាត់សេចក្ដីរកក្រុមធ្លាក់ និងក្រុមត្រូវឡើងទៅកាន់វគ្គបន្ត ក៏បានចូលមកដល់នៅសប្តាហ៍នេះ ដោយកំណត់លេងនៅវេលាម៉ោង ០៣:០០ នាទីទាបភ្លឺ ឈានចូលថ្ងៃពុធ ទី ១៦ មិនា នៅឯកីឡដ្ឋាន Old Trafford មានផ្សាយផ្ទាល់លើទំព័រ CTS Sports។
កាលពីអត្ថបទមុន យើងបានវិភាគ និងទស្សន៍ទាយត្រូវគ្រាប់បាល់ជូនប្រិយមិត្តម្តងរួចមកហើយ នូវជំនួប Real Madrid-PSG ឥឡូវយើងសូមបង្វែរមកវិភាគនូវគូពិសេសថ្មី រវាង Man Utd-At Madrid វិញម្តង អំពីហេតុផលមួយចំនួន ក៏ដូចជាការព្យាករណ៍គ្រាប់បាល់នៅខាងចុងអត្ថបទ៖
១) ស្ថានភាពកីឡាករ
សមាជិកសំខាន់ៗជាច្រើនរបស់ក្រុមលោក Diego Simeone បានរបួសគរជើងគ្នា ពោលដល់ទៅ ៨ រូបឯណោះ ដែលកំណត់នឹងត្រូវអវត្តមានសម្រាប់ការប្រកួតនៅពេលដ៏ខ្លីខាងមុខ។ ក្នុងនោះរួមមាន Thomas Lemar, Sime Vrsaljko, Mario Hermoso, Geoffrey Kondogbia, Matheus Cunha, Daniel Wass និង Jose Gimenez ដែលទើបតែរបួសកាលពីចុងសប្តាហ៍ បូកផ្សំនឹង Yannick Carrasco ត្រូវពិន័យព្យួរឈ្មោះផង ដូច្នេះតាំងពីតំបន់ការពារ មកដល់ប្រយុទ្ធ គឺ At មិនពេញសាច់ល្អឡើយ។
ទៅមើល Man Utd មានតែកីឡាករ ៣ រូបប៉ុណ្ណោះ ដែលប្រឈមនឹងអវត្តមាន តែស្ថិតនៅភាគរយទាប ថាមិនត្រូវពួកគេ អាចវិលមកវិញទាន់ពេលទាំងអស់ក៏ថាបាន។ ករណីរបស់ខ្សែបម្រើ Scott McTominay និង Bruno Fernandes ដែលមានបញ្ហាកំភួនជើង និងជំងឺផ្ទាល់ខ្លួន កំពុងស្ថិតក្រោមការឃ្លាំមើល រីឯ Luke Shaw ដែលតេស្តឃើញផ្ទុកកូវីដ-១៩ ប្រហែលអាចជាសះស្បើយទាន់ពេល។
២) ស្ថិតិនៃការប្រកួត
បើនិយាយការប៉ះគ្នារវាងក្រុមទាំងពីរ គឺជួបគ្នាតែ ៣ លើកគត់ ដោយ At ឈ្នះ ១ ស្មើ ២។ ជ័យជម្នះមួយលើកនោះ គឺកើតឡើងតាំងពីឆ្នាំ ១៩៩១ នៅពាន European Cup Winners Cup ដែលក្លឹបអេស្ប៉ាញ យកឈ្នះក្លឹបអង់គ្លេស ៣-០។
ងាកមក ៣ ប្រកួតចុងក្រោយរវាងក្លឹបទាំងពីរ ឃើញថា Atletico បង្ហាញទម្រង់លេងល្អជាង ដោយឈ្នះទាំង ៣ ប្រកួត ដូចជ័យជម្នះ ២-០ លើ Celta Vigo, ៣-១ លើ Real Betis និង ២-១ លើ Cadiz។ ងាកទៅ United ធ្វើមិនសូវបានល្អឡើយ ដោយស្មើ ០-០ ទល់ Watford, ចាញ់ Man City ៤-១ ហើយទើបតែមកលេងល្អ គ្រាប៉ះ Tottenham នៅលទ្ធផល ២-៣ កាលពីរំលងអាធ្រាត្រឈានចូលថ្ងៃអាទិត្យ។
៣) លទ្ធផលព្យាករណ៍
សម្រាប់ជម្រើស ១១ នាក់ដំបូងយើងជឿថា United នឹងបន្តប្រើប្រព័ន្ធ ៤-២-៣-១ មានដូចជា៖
David de Gea; Diogo Dalot, Harry Maguire, Raphael Varane, Alex Telles; Fred, Scott McTominay; Marcus Rashford, Bruno Fernandes, Jadon Sancho; Cristiano Ronaldo
រីឯ Atletico នឹងប្រើប្រព័ន្ធ ៣-៥-២ រួមមាន៖
Jan Oblak; Stefan Savić, Felipe, Reinildo; Llorente, Hector Herrera, Koke, Rodrigo De Paul, Renan Lodi; João Félix, Antoine Griezmann
ជាលទ្ធផលដោយមើលឃើញថា Atletico ហាក់បាត់បង់សមាជិកសំខាន់ច្រើន ដូច្នេះឱកាសក្នុងការឈ្នះក៏នឹងមានទាបទៅតាមនោះដែរ។ ទន្ទឹមគ្នានោះ យើងមើលការលេងរបស់ United នៅថ្ងៃប៉ះ Tottenham កាលពីចុងសប្តាហ៍ ឃើញថា Cristiano Ronaldo កំពុងឡើងជើងខ្លាំង ហើយក៏ជឿថា លោកនឹងនៅតែបន្តអាចរកបានគ្រាប់បាល់ ដើម្បីកែប្រវត្តិសាស្រ្ត ឲ្យបិសាចក្រហមស្គាល់ជ័យជម្នះជាលើកដំបូងទៅលើក្រុមក្រហមស។
ទោះជាយ៉ាងណា យើងជឿថា ប្រកួតសារនេះ ក្រុមម្ចាស់ផ្ទះក៏នឹងមិនអាចទប់ Clean Sheet បាននោះដែរ ព្រោះអីប្រព័ន្ធការពារ United ដូចអ្នកដឹងស្រាប់ហើយ មិនជារឹងមាំប៉ុន្មានឡើយ ពោលគឺនឹងមានការរបូតគ្រាប់បាល់យ៉ាងហោចណាស់មួយគ្រាប់។ តែដោយសារចង្វាក់លេងពីតំបន់បម្រើ និងប្រយុទ្ធរបស់ក្រុមលោក Ralf Rangnick ឃើញថាល្អពេលប៉ះ Spurs អ៊ីចឹងយើងហ៊ានទាយបកមកវិញ ថា United នឹងស៊ី At ២-១ នាំឲ្យក្រុមអង់គ្លេស ចាប់កៅអីឡើងទៅកាន់វគ្គ ៨ ក្រុមចុងក្រោយបានដោយជោគជ័យ។ លទ្ធផលព្យាករណ៍សារនេះ ក៏មិនខុសពីសារមុន លើ ២,៥ គ្រាប់ ជាគ្រាប់បាល់ដែលនឹងកើតឡើងជាក់ជាមិនខាន៕
ប្រភព៖ បរទេស