ពីមួយសប្តាហ៍ទៅមួយសប្តាហ៍ អ្នកគាំទ្រ Man Utd រមែងទស្សនាទាំងបុកពោះ ឲ្យតែពេលមានវត្តមាន Harry Maguire នៅជម្រើស ១១ នាក់ដំបូង ហើយសប្តាហ៍នេះ ក៏ប្រធានក្រុមសញ្ជាតិអង់គ្លេស នៅតែបន្ត បង្កកំហុសច្រំដែល សម្រាប់ការប្រកួតទល់ក្លឹប Tottenham Hotspur នៅឯកីឡដ្ឋាន Old Trafford។
តែយ៉ាងណា ពាក្យរិះគន់ហាក់មិនផ្ទុះខ្លាំងដូចមុនទេ បើទោះបី Maguire ភ្លាត់ស្នៀត ស៊ុតបាល់ចូលទីខ្លួនឯងក៏ដោយ នោះក៏ដោយសារតែ Man Utd អាចយកឈ្នះ ៣-២ ទៅលើ Spurs ហើយគ្រាប់បាល់ Hat-trick របស់ Ronaldo បានឆក់យកបេះដូងអ្នកគាំទ្រ គ្របជិតលើកំហុសប្រធានក្រុមវ័យ ២៩ ឆ្នាំ។
CR7 រកបានគ្រាប់បាល់បើកឆាក ជាការស៊ុតក្រៅប្រអប់ បែប Long-range នាំមុខមុននៅនាទី ១២ មុនពេល Harry Kane ទទួលឱកាសស៊ុតបាល់ ១១ ម៉ែត្រ នៅនាទី ៣៥ ជាការប៉ះដៃរបស់ Alex Telles។ រំលង ៣ នាទីបន្ទាប់ Jadon Sancho បានកាត់បាល់ចូលយ៉ាងល្អ Assist ឲ្យ Ronaldo រកបានគ្រាប់បាល់ទីពីរ។
លទ្ធផលរក្សាដល់នាទី ៧២ ជាពេលដែល Maguire បង្កកំហុសធ្ងន់ ព្យាយាមស្លាយបាល់ចេញ តែបែរជាភ្លាត់ស្នៀតនាំឲ្យបាល់ចូលទី កើតមានលទ្ធផលស្មើបណ្ដោះអាសន្ន។ មិនបញ្ចប់ត្រឹមប៉ុណ្ណឹងទេ ការលេងដោយកំហឹងរបស់ Ronaldo សារនេះ ក៏ខិតខំដល់រកបានគ្រាប់បាល់ទីបី នៅនាទី ៨១ បន្ទាប់ពី Telles លើកបាល់ Corner ឲ្យមិត្តរួមសញ្ជាតិ ហក់តែតបញ្ចប់ទី យក ៣ ពិន្ទុឲ្យក្រុមបានសម្រេច។
នេះបង្ហាញច្បាស់ថា Maguire គួរតែអរគុណដល់ Ronaldo ជាពិសេស មិនដូច្នោះទេ កំហុសរបស់គេ នឹងត្រូវបានអ្នកគាំទ្រលើកមកជជែកម្តងហើយម្តងទៀតជាក់ជាមិនខាន។ យ៉ាងណា បើយើងប្រមើលមើលពីអនាគតរបស់កីឡាករអង់គ្លេស ក៏ហាក់មិននឹងនដូចកាលពីដើមរដូវកាលដែរ បន្ទាប់កើតមានកំហុសជាច្រើនលើកច្រើនសារ។
បើតាមចចាមអារ៉ាមចុះផ្សាយពេលថ្មីៗនេះ ថ្នាក់លើក្លឹបម្ចាស់ដី Old Trafford ក៏បានដាក់គោលដៅទៅលើបេក្ខភាព ២ រូបរួចជាស្រេច ដោយចង់សម្រេចការចរចា នាំយកមកជំនួសតំណែង Maguire នៅក្រោយបញ្ចប់រដូវកាលខាងមុខ។ ជាមួយគ្នានេះដែរ ក្លឹបក៏នឹងអាចលក់ចេញទៅវិញ នូវអតីតកីឡាករក្លឹប Leicester City បើទោះបីត្រូវខាត ៥០ ភាគរយ ជួនពេលដែលសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៥។
គោលដៅធំ ២ ដែល United សម្លឹងចង់នាំយក គឺមាន Antonio Rudiger របស់ក្លឹប Chelsea ដែលគេនឹងផុតកុងត្រា ក្លាយជាកីឡាករឥតតម្លៃផ្ទេរ ចាប់ពីថ្ងៃទី ១ កក្កដា ឆ្នាំ ២០២២ និងមួយផ្សេងទៀត គឺ Lucas Hernandez របស់ក្លឹបអាល្លឺម៉ង់ Bayern Munich ដែលអាចមានហាងឆេងល្បាក់ ៤០ លានផោន។ ចុះសម្រាប់គ្នាយើងវិញ គិតថាក្លឹប គួរតែបន្តរក្សាវត្តមាន Maguire តទៅទៀតដែរឬទេ ហើយបើយកអ្នកថ្មីមកជំនួស នរណាដែលនឹងសក្តិសមបំផុត?
ប្រភព៖ បរទេស