ខ្សែបម្រើ Paul Pogba បានសរសើរមិនដាច់ពីមាត់ដល់គុណភាពមិត្តរួមទ្រនំ Cristiano Ronaldo ថាពិតសក្ដិសមជាខ្សែប្រយុទ្ធល្អបំផុតក្នុងប្រវត្តិសាស្ត្រ បន្ទាប់រកបានគ្រាប់បាល់ Hat-trick ជួយ Man Utd យកឈ្នះ ៣-២ ទៅលើក្លឹបមាន់ខ្នាយមាស Tottenham Hotspur កាលពីយប់មិញ។
CR7 រកបានគ្រាប់បាល់ Hat-trick ទី ៥៩ ក៏ដូចជាគ្រាប់បាល់ទី ៨០៧ ក្នុងអាជីព ជាទិន្នន័យកត់ត្រាលើគេហទំព័រផ្លូវការ FIFA។ ក្រោយចប់ការប្រកួត ខ្សែបម្រើសញ្ជាតិបារាំងនិយាយ៖ “យើងបានធ្វើឲ្យក្រុមគូប្រជែងឈឺចាប់ត្រូវពេល ដោយ Ronaldo ធ្វើបានយ៉ាងល្អជាទីបំផុត”។
បន្តប្រាប់សារព័ត៌មាន BBC Sport៖ “គេមិនដែលជាបញ្ហាសម្រាប់ពួកយើងទេ តែគេគឺជាខ្សែប្រយុទ្ធល្អបំផុតក្នុងប្រវត្តិសាស្រ្ត នៅក្នុងក្រុមរបស់យើង ថ្ងៃនេះ គេបង្ហាញទម្រង់លេងយ៉ាងល្អ ក៏ដូចជាក្រុមទាំងមូលផងដែរ គ្រប់គ្នាស្គាល់ច្បាស់ហើយពី Cristiano ដូច្នេះខ្ញុំអត់ចាំបាច់និយាយអ្វីច្រើននោះឡើយ”៕
ប្រភព៖ Goal