បន្ទាប់ទទួលដំណឹងថា Xavi Hernandez លែងត្រូវការខ្សែបម្រើកាន់ឆ្នាំ Sergi Roberto ក៏នាំឲ្យក្លឹបជាច្រើន ទាំងក្នុងនិងក្រៅតំបន់អឺរ៉ុប បានចាប់អារម្មណ៍ឱកាសសារនេះ ដើម្បីសម្រេចការចរចានាំយកគេចេញពីទឹកដី Camp Nou ជួនពេលដែលសុពលភាពកុងត្រា នឹងត្រូវផុតត្រឹមចុងខែមិថុនា ឆ្នាំ ២០២២ ខាងមុខផង។
កីឡាករអេស្ប៉ាញ បានរួមជើងពេញមួយអាជីព តាំងពីកាលនៅថ្នាល មកដល់ឈុតធំជាមួយ Barcelona តែពេលចុងក្រោយ គេលែងទទួលបានឱកាស ក្រោមការដឹកនាំរបស់គ្រូរួមសញ្ជាតិលោក Xavi។ ជាក់ស្តែងដូចរដូវកាលនេះ ទើបឈរជើងបាន ៥៦៧ នាទី ស្មើនឹង ១២ ប្រកួត រកបាន ២ គ្រាប់និង Assist ១ លើកឲ្យក្លឹប។
បើតាមសារព័ត៌មាន Fichajes ចុះផ្សាយថា ក្រៅពីក្លឹប Arsenal និង Manchester City ឥឡូវសូម្បីតែក្លឹបរួមលីគ និងជាក្លឹបគូប្រជែង គឺ Atletico Madrid ក៏ចាប់អារម្មណ៍ឱកាសសារនេះផងដែរ ហើយពួកគេក៏នឹងត្រូវប្រជែងជាមួយក្លឹបនៅឯលីគ MLS របស់អាមេរិកមួយចំនួនផ្សេងទៀត។ សរុបស្ថិតិរបស់ Roberto ឈរជើងឲ្យអ្នកមានបុណ្យ មាន ៣១៦ ប្រកួត ធ្លាប់សម្រេចការលើកពាន La Liga ៦ លើក Champions League ២ លើក និង Copa del Rey ៦ លើកផងដេរ៕
ប្រភព៖ Fichajes