ខ្សែប្រយុទ្ធ Kylian Mbappe បាននិយាយថាពានរង្វាន់ UEFA Champions League គឺជាពានគោលដៅធំសម្រាប់ក្រុម PSG ហើយ ប៉ុន្តែនៅពេលនេះបានត្រឹមធ្លាក់នៅវគ្គ១៦ក្រុមប៉ុណ្ណោះ។
កីឡាករវ័យ២៣ឆ្នាំខាងលើជាអ្នករកគ្រាប់បាល់១គ្រាប់កាលជើងទី១ ហើយក៏រកបាន១គ្រាប់ទៀតនៅជើងទី២ ទល់ក្រុម Real Madrid ប៉ុន្តែគួរឱ្យសោកស្ដាយ ក្រុម PSG របស់គេចាញ់ក្រុម Real Madrid សរុប ៣-២ ទៅវិញ។ លទ្ធផលនេះ បានធ្វើឱ្យក្រុម PSG ធ្លាក់ត្រឹមវគ្គ១៦ក្រុមចុងក្រោយនេះទៅហើយ មិនអាចបន្ដឡើងទៅវគ្គខាងមុខទៀតទេ។ វាជាលទ្ធផលដែលធ្វើឱ្យថ្នាក់ដឹកនាំ ក៏ដូចជាកីឡាករផ្ទាល់ខកចិត្តជាខ្លាំង។
Mbappe បានបង្ហាញចំណាប់អារម្មណ៍ដែរថា៖ “ពេលវេលាលំបាក។ Champions League ជាគោលដៅធំសម្រាប់យើង ប៉ុន្តែយើងបានធ្លាក់ចេញហើយ។ រដូវកាលមិនទាន់បញ្ចប់ទេ ហើយអ្វីដែលនឹងកើតឡើងលើយើង យើងនឹងរង់ចាំមើល។ អរគុណអ្នកគាំទ្រដែលតែងតែគាំទ្ររហូតមក”៕ប្រភព៖ MARCA
