បន្ទាប់ពីរដ្ឋាភិបាលអង់គ្លេសសម្រេចចិត្តដាក់ទណ្ឌកម្មលើលោក Roman Abramovich មក នៅពេលនេះ Sponsor ក្លឹបជាច្រើនក៏កំពុងពិចារណាដើម្បីដកខ្លួនចេញផងដែរ។
Chelsea នឹងបាត់ចំណូលច្រើន ព្រោះរដ្ឋាភិបាលអង់គ្លេសលែងឱ្យគេលក់សំបុត្រចូលទស្សនាការប្រកួតឱ្យអ្នកគាំទ្រទៀតហើយ។ ខណៈដែលលោក Abramovich វិញ ក៏នឹងមិនអាចយកប្រាក់មកជួយក្លឹបនេះទៀតដែរ ព្រោះកុងធនាគាររបស់លោកនៅអង់គ្លេសត្រូវគេបង្កកអស់ទៅហើយ មួយវិញទៀតជំនួញរបស់លោកផ្ទាល់ក៏ប៉ះពាល់មិនតិចផងដែរ។
កំពុងតែមិនមាននរណាជាម្ចាស់ផង នៅពេលនេះ Sponsor ខ្លះបានសម្រេចចិត្តដកខ្លួនលែងដាក់ជាមួយក្រុម Chelsea ទៅហើយ។ ជាក់ស្ដែងដូចជា Three ដែលដាក់នៅលើអាវ មានតម្លៃ៤០លានផោននោះ បានសម្រេចចិត្តដកខ្លួនចេញ។ ស្របពេលក្រុមហ៊ុនយក្ស Nike វិញក៏កំពុងពិចារណាដែរ។ Nike បាន Sponsor លើក្លឹប Chelsea តាំងពីឆ្នាំ២០១៦មក ដោយមានកុងត្រា១៥ឆ្នាំ តម្លៃដល់ទៅ៩០០លានផោនឯណោះ។ ប្រសិនបើពួកគេដើរចេញនៅពេលនេះ នោះក្លឹប Chelsea នឹងប៉ះពាល់ខ្លះមិនខាន ព្រោះប្រាក់កុងត្រានៅសល់៥៤០លានផោនទៀត៕ប្រភព៖ DailyMail
