ក្លឹប Arsenal នៅរយៈពេលចុងក្រោយ ហាក់ឡើងជើងខ្លាំង ដោយនាំឲ្យមានការជឿជាក់ថា នៅរដូវកាលក្រោយ ពួកគេអាចជានឹងមានឱកាសវិលទៅលេងពានអឺរ៉ុប UEFA Champions League សារជាថ្មី ក្រោយខកខានតាំងពីរដូវកាល ២០១៦/១៧។ គិតត្រឹមជុំទី ២៥ ដែលសល់ ៣ ជុំក្នុងដៃ ធៀបនឹងក្រុមឯទៀត កាំភ្លើងធំឈរលេខរៀងទី ៤ មាន ៤៨ ពិន្ទុ នាំមុខទៅលើ Man Utd ១ ពិន្ទុ។
ដូចគ្នាទៅនឹង ក្លឹប Tottenham Hotspur ពួកគេក៏សង្កេតឃើញធ្វើបានល្អដែរនៅពេលចុងក្រោយ ហើយថាមិនត្រូវ ក្លឹបដឹកនាំដោយលោក Antonio Conte អាចនឹងចាប់យកឱកាស បានឈរនៅកៅអី Top 4 នាបញ្ចប់រដូវកាលក៏ថាបាន។ ប៉ុន្តែ មិនប្រាកដថា ឲ្យតែបានលេខ ៤ គឺដឹងតែបានលេង Champions League នោះទេ ព្រោះអីបើក្លាយជាឆ្នាំស៊យ នោះក្រុមលេខ ៤ នឹងបានត្រឹមកៅអី Europa League ប៉ុណ្ណោះ។
ក៏ដោយសារតែច្បាប់របស់ UEFA បានកំណត់មកថា ប្រសិនណាជាក្លឹបឈរក្រៅចំណាត់ថ្នាក់ Top 4 អាចឈ្នះពាន ឬក្លាយជាម្ចាស់ជើងឯក នោះសមាគមនឹងសម្រេចផ្តល់ឲ្យតែ ៣ កៅអីប៉ុណ្ណោះ សម្រាប់លីគកំពូលអង់គ្លេស។ សាមញ្ញទៅមានន័យថា បើក្រុមលេខ ៥ ឡើងជាអ្នកឈ្នះពាន នោះមានតែក្រុមលេខ ១,២ និង ៣ ដែលទទួលបានកៅអីទៅចូលរួមការប្រកួត UCL រដូវកាលបន្ទាប់។
ដូច្នេះ យើងសុំបន្ថែមឧទាហរណ៍ឲ្យងាយយល់ ពោលប្រសិនណាជា Arsenal ឬ Spurs ឈរលេខ ៤ ក៏ប៉ុន្តែក្លឹបឈ្នះជើងឯកជា Man Utd ដែលឈរលេខ ៥ នោះមានន័យថា Arsenal ឬ Spurs ក៏នៅតែត្រូវធ្លាក់ទៅលេងនៅ Europa League ហើយ United បានកៅអីស្វ័យប្រវត្តិ បូកនឹងកៅអីនៃក្លឹប Top 3។ ច្បាប់នេះដែរ ក៏អនុវត្តដូចគ្នាទៅក្នុងលក្ខខណ្ឌផ្តល់កៅអីសម្រាប់ការប្រកួត Europa League ក៏ដូចជា Europa Conference League។
តាមពិតទៅវាធ្លាប់កើតមានរឿងនេះម្តងដែរ មកលើក្លឹប Spurs នោះគឺនៅឆ្នាំ ២០១២ ដែលក្រុមមាន់ខ្នាយមាស ធ្វើបាន ៦៩ ពិន្ទុ ឈរនៅលេខរៀងទី ៤ ក៏ប៉ុន្តែក្លឹបឈ្នះជើងឯកពាន UCL គឺជា Chelsea ដែលឈរលេខ ៦។ ដូច្នេះ UEFA ក៏អនុវត្តទៅតាមច្បាប់ ដោយផ្តល់កៅអីស្វ័យប្រវត្តិដល់ Chelsea ដ្បិតពួកគេឈរលេខ ៦ ចាញ់ Arsenal ៥ ពិន្ទុ ហើយដល់ក្លឹប ៣ ផ្សេងទៀត មាន Man City, Man Utd និង Arsenal ដែលជាក្រុម Top 3។
ដូច្នេះយើងមានតែរង់ចាំមើលថា តើក្លឹប Man Utd ដែលគេជឿលើភាគរយច្រើន អាចនឹងឈរក្រៅចំណាត់ថ្នាក់ Top 4 អាចយកឈ្នះទៅលើ Atletico Madrid រួចបន្តដំណើរទៅមុខទៀតបានដែរឬយ៉ាងណា?
រំឭកឲ្យគ្នាយើងដឹងបន្តិចថា ទាំង Spurs និង Arsenal សុទ្ធជាក្រុមមិនធ្លាប់ស្គាល់រសជាតិលើកពាន UCL ដោយពួកគេធ្លាប់ឡើងដល់វគ្គផ្តាច់ព្រ័ត្ររៀងគ្នា តួយ៉ាងគឺ Spurs ចាញ់ Liverpool ២-០ កាលពី ឆ្នាំ ២០១៩ ហើយ Arsenal ចាញ់ Barcelona ១-២ កាលពីឆ្នាំ ២០០៦៕
ប្រភព៖ បរទេស