លើទំព័រ CTS Sports នៅវេលាម៉ោង ០៣:០០ នាទីទាបភ្លឺ ឈានចូលថ្ងៃព្រហស្បតិ៍ ទី ១០ មិនា នឹងមានផ្សាយបន្តផ្ទាល់នូវជំនួប រវាងក្លឹបអធិរាជស Real Madrid ទល់ក្លឹបសេដ្ឋីបារាំង PSG ជាជំនួបជើងទី ២ វគ្គ ១៦ ក្រុមចុងក្រោយ UEFA Champions League។
លទ្ធផលកាលពីជើងទី ១ ខាងក្រុមដឹកនាំដោយលោក Mauricio Pochettino បាននាំមុខ ១-០ ធ្វើបានដោយ Kylian Mbappe ដូច្នេះហើយការប្រកួតជើងទី ២ គឺសុំតែទប់ត្រឹមស្មើ នោះក៏អាចផ្តល់កៅអីទៅកាន់វគ្គបន្ទាប់ផងដែរ។ យ៉ាងណាវាប្រហែលជាមិនងាយស្រួល នោះឡើយសម្រាប់ PSG បើទោះបីនាំមុខមុន ១ គ្រាប់ ព្រោះនេះ គឺជាការលេងទល់ក្រុមម្ចាស់ជើងឯក ១៣ សម័យកាល ដែលមានបទពិសោធន៍ជោកជាំទៅហើយនៅពានអឺរ៉ុប។
ខាងក្រោម CTS Sports បង្ហាញហេតុផល ៣ ដែលជឿថា Real Madrid នឹងអាចទម្លាក់ PSG ត្រឹមវគ្គ ១៦ ក្រុមនៅរាត្រីនេះ ក៏ដូចជាលទ្ធផលទស្សន៍ទាយគ្រាប់បាល់៖
៣) ភាពមិនប្រាកដប្រជារបស់ Mbappe
បើទោះបីមានឈ្មោះក្នុងបញ្ជីកីឡាកររបស់ PSG តែសម្រាប់ Kylian Mbappe គឺមិនប្រាកដប្រជាថាបានត្រៀមខ្លួន ១០០ ភាគរយនោះទេ។ ក៏ដោយសារតែមុនការប្រកួត ៣ ថ្ងៃ គ្រាប់ពេជ្រខាងលើ បានជួបបញ្ហារបួសកំឡុងពេលហ្វឹកហាត់ ដូច្នេះប្រកួតពេលខាងមុខ លោក Mauricio Pochettino ទំនងជានឹងដាក់ ឲ្យគេលេងបម្រុងច្រើនជាងជាប់ជម្រើសដំបូង។
ប្រសិនត្រូវអវត្តមាន Mbappe នៅឈុត ១១ នាក់ពិតមែន នោះប្រព័ន្ធប្រយុទ្ធខាងលើ ប្រហែលជាត្រូវជំនួសដោយការដាក់ Angel di Maria ដែលនេះយើងជឿថា ប្រាកដជាស្ទើរជើង មិនពេញទម្រង់ដូចកាលពីវគ្គទី ១ ឡើយ។
២) ប្រព័ន្ធបម្រើដ៏គួរឲ្យបារម្ភរបស់ Real Madrid
ដ្បិតក្លឹបអធិរាជស ត្រូវអវត្តមានខ្សែបម្រើការពារ Casemiro តែយ៉ាងណាអ្នកចាត់ការលោក Carlo Ancelotti ក៏នៅសល់ជម្រើសល្អផ្សេងទៀតក្នុងដៃ ហើយកាន់តែត្រូវប៉ាន់ សម្រាប់ការប្រើប្រាស់នូវប្រព័ន្ធសម្រុក High Press ដើម្បីយកឲ្យបានគ្រាប់បាល់នៅយប់នេះ។
ក្លឹបអាចជំនួសរវាង Federico Valverde ឬ Eduardo Camavinga នៅកន្លែងអវត្តមាន Casemiro អមដោយបម្រើខាងលើ ២ ផ្សេងទៀត គឺ Toni Kroos និង Luka Modric។ យើងជឿថា ប្រព័ន្ធបម្រើរបស់ Madrid យប់នេះនឹងកាន់តែសហការគ្នាបានល្អ ក្នុងការដឹកបាល់ឡើងទៅលើ ជាងមានវត្តមាន Casemiro ទៅទៀត។
១) ស្ថិតិរបស់ក្លឹបទាំងពីរ
ទោះបីយកឈ្នះ Real Madrid ១-០ កាលពីលេងក្នុងទីក្រុងប៉ារីស តែ ៣ ប្រកួតបន្ទាប់ PSG លេងឈ្នះតែ ១ ប៉ុណ្ណោះ ហើយបែរចាញ់ Nice ១-០ និងចាញ់ Nantes ៣-១។ នេះបង្ហាញថា ប្រព័ន្ធលេងរបស់ក្លឹបនៅពេលចុងក្រោយ គឺមានការធ្លាក់ចុះ ដែលជារឿងគួរឲ្យបារម្ភ ខុសពី Madrid ពួកគេធ្វើបានល្អខ្លាំង តាមរយៈការយកឈ្នះទាំង ៣ ប្រកួត នៅចំនួនគ្រាប់បាល់សរុប ៨ គ្រាប់ ទោលើ Alaves, Rayo Vallecano និង Real Sociedad។
ចំណុចសំខាន់មួយផ្សេងទៀត គឺស្ថិតិរបស់អធិរាជរដូវកាលនេះ ការលេងក្នុងដី ស្គាល់បរាជ័យតែ ១ លើកគត់ ប៉ុន្តែ PSG ឯណោះ បរាជ័យសរុបទាំង ៥ លើក គឺមានដល់ទៅ ៤ លើក ដែលចាញ់ ពេលធ្វើដំណើរជាក្រុមភ្ញៀវ។ សរុបមកយើងហ៊ានទស្សន៍ទាយថា ការលេងនៅដី Bernabeu រាត្រីនេះ យ៉ាងហោច Real នឹងយកឈ្នះ ២-១ ដែលនាំឲ្យការប្រកួតត្រូវបន្ថែមម៉ោង ១៥ នាទីពីរដង ឬឈានដល់ការស៊ុតប៉េណាល់ទី ហើយម្យ៉ាងទៀត អាចឈ្នះដាច់ ៣-១ ជារួម គឺលើ ២,៥ គ្រាប់៕
ប្រភព៖ បរទេស