បើតាមសារព័ត៌មាន La Gazzetta dello Sport ចុះផ្សាយថា ក្លឹបអ្នកមានបុណ្យ Barcelonaបានព្រមព្រៀងនឹងផ្តល់ប្រាក់ពលកម្មដ៏សមរម្យមួយ ជូនខ្សែការពារ Kalidou Koulibaly ឲ្យតែគេព្រម ទម្លាក់ចុងប៊ិចចុះហត្ថលេខា ដើរចេញពីក្លឹប Napoli ហើយមកចុះចូលនៅទឹកដី Camp Nou នៅទីផ្សារដោះដូររដូវក្តៅខាងមុខ។
ក្លឹបដឹកនាំដោយលោក Xavi Hernandez ហាក់ចង់ពង្រឹងប្រព័ន្ធជើងក្រោម រួចក៏មើលឃើញបេក្ខភាពធំៗមួយចំនួន រួមទាំងនៅលីគអង់គ្លេសផងដែរ។ យ៉ាងណា Koulibaly ក៏ជាកីឡាករសំខាន់ ដែលក្លឹបមិនអាចមើលរំលង ដ្បិតអីសុពលភាពកុងត្រាជាមួយក្លឹបអាណាព្យាបាលសេសសល់ដល់ចុងខែមិថុនា ឆ្នាំ ២០២៣។ សម្រាប់កីឡាករសេណេហ្គាល់ អាចជាមានតម្លៃខ្លួនយ៉ាងហោចណាស់ ៧០ លានអឺរ៉ូ។
តាមប្រភពបានឲ្យដឹងថា Xavi កំពុងរំអុកក្លឹបឲ្យចរចានូវតម្លៃផ្ទេរ ដើម្បីសម្រេចនាំយកគេ មកចូលរួមនៅរដូវកាលថ្មី ២០២២/២៣ ហើយចង់ផ្តល់កុងត្រាថ្មីសន្លាងដល់ចុងខែមិថុនា ឆ្នាំ ២០២៦ អមនឹងថ្លៃពលកម្មដ៏សមរម្យមួយសម្រាប់គេផងដែរ។ ទៅមើលស្ថិតិរដូវកាលនេះបន្តិច បុរសវ័យ ៣០ ឆ្នាំ បង្ហាញខ្លួន ២៥ ប្រកួត រកបាន ២ គ្រាប់និង Assist ២ លើកឲ្យក្លឹបឈរលេខ ៣ នៅក្របខ័ណ្ឌ Serie A៕
ប្រភព៖ La Gazzetta dello Sport