បុរសដែលមានឈ្មោះពេញ Diogo Jose Teixeira da Silva ឬត្រូវបានគេស្គាល់ជា Diogo Jota បានកើតនៅថ្ងៃទី ៤ ធ្នូ ឆ្នាំ ១៩៩៦ ក្នុងទីក្រុង Porto ប្រទេសព័រទុយហ្គាល់ ពេលនេះកំពុងក្លាយជាកីឡាករដ៏សំខាន់មួយរបស់ក្លឹបហង្សក្រហម Liverpool ដោយពេលចុងក្រោយ បានក្លាយជាតួឯកជំនួសវត្តមាន Roberto Firmino។
ក្រៅតែពីបានឃើញនូវសមត្ថភាពរបស់គេលើទីលាន CTS Sports ជឿថា អ្នករាល់គ្នាប្រហែលជាមិនធ្លាប់បានដឹងនោះទេ នូវរឿងរ៉ាវរសើបគួរឲ្យចាប់អារម្មណ៍ ៣ ពីកីឡាករវ័យ ២៥ ឆ្នាំខាងលើ៖
៣) ជាបុរសស្មោះស្នេហ៍
ឈ្មោះជាកីឡាករបាល់ទាត់ល្បីល្បាញម្នាក់ ជារឿងធម្មតាទេ ដែលមាននារីរូបស្រស់ជាច្រើនតាមក្រវែល តែសម្រាប់ Jota គឺរាប់បានជាបុរសស្មោះមួយនឹងមួយ មិនចេះវៀចវេរ ឬលួចទាក់ទងក្រៅដូចកីឡាករមួយចំនួនទៀតឡើយ។
ចំណងស្នេហ៍របស់ Jota កាន់ឆ្នាំប្រហែលនឹង Messi&Antonella ដែរ ដោយលោកបានរក្សាទំនាក់ទំនងជាមួយមិត្តស្រី រួមទីក្រុង Porto តាំងពីឆ្នាំ ២០១៣ មកទល់បច្ចុប្បន្ន។ សព្វថ្ងៃដ្បិតមិនទាន់រៀបអាពាហ៍ពិពាហ៍ តែ Jota និងតារាម៉ូដែលស្រី Rute Cardoso បានបង្កើតកូនប្រុសមួយ ឈ្មោះ Dinis កាលពីខែកុម្ភៈ ឆ្នាំ ២០២១ ហើយក៏មានសមាជិកជាសត្វឆ្កែដ៏គួរឲ្យស្រលាញ់មួយផ្សេងទៀត ឈ្មោះ Luna។
២) idol ក្នុងដួងចិត្ត
មិនទៅគាំទ្រវីរបុរសណាឆ្ងាយ សម្រាប់ Jota បានមានចិត្តស្រលាញ់គាំទ្រកីឡាកររួមសញ្ជាតិ គឺរៀមច្បង Cristiano Ronaldo តាំងតែពីនៅក្មេងវ័យ។ អាយុខុសគ្នាជាងមួយជួរ តែទីបំផុត Jota ក៏អាចសម្រេចក្តីស្រមៃ លេងរួមគ្នាជាមួយនឹងកីឡាករក្នុងដួងចិត្ត នៅឯជម្រើសជាតិព័រទុយហ្គាល់ កាលពីឆ្នាំ ២០១៩។
Jota ធ្លាប់ប្រាប់ទៅកាន់សារព័ត៌មាន FourFourTwo៖ “Cristiano គឺជា idol របស់ខ្ញុំ ដោយខ្ញុំបានមើលគាត់លេងនៅកម្រិតដ៏ខ្ពស់ ពេលឈរជើងឲ្យក្លឹប Manchester United ជាលើកដំបូង ហើយគាត់បានឈ្នះពានរង្វាន់ Ballon d’Or និងពានជាច្រើនទៀត”។
លោកបន្ត៖ “ក្នុងនាមជាកីឡាករព័រទុយហ្គាល់ម្នាក់ ខ្ញុំតែងតែរៀនសូត្រពីគាត់ ដើរតាមគន្លងរបស់គាត់ យកគាត់ជាគំរូ ហើយមានពេលវេលាមួយនោះ ពិសេសបំផុតក្នុងជីវិតរបស់ខ្ញុំ គឺពេលបង្ហាញខ្លួនលើកដំបូង ដែលខ្ញុំប្តូរចូលជំនួសគាត់ នៅប្រកួតទល់លីទុយអានីកាលពីខែវិច្ឆិកា ឆ្នាំ ២០១៩ ហើយក៏រីករាយបំផុតដែរ ពេលបានរួមបន្ទប់ផ្លាស់សំលៀកបំពាក់ជាមួយ Cristiano”។
៣) ក្លឹបដែលគេស្រលាញ់គាំទ្រ
មិនមែនជា Liverpool ក៏មិនមែនជា Wolves ឬអតីតក្លឹបចាស់ Atletico Madrid អីនោះដែរ តែបែរជា Everton ជាក្លឹបដែល Jota ស្រលាញ់គាំទ្រកាលពីដំបូង។ ហ្នឹងហើយអត់ច្រឡំទេ គឺជាក្លឹបគូប្រជែងរួមទីក្រុង Merseyside របស់ហង្ស ដែលនេះប្រាកដជារឿងភ្ញាក់ផ្អើលថ្មីមួយសម្រាប់អ្នកគាំទ្រ។
Jota ធ្លាប់និយាយប្រាប់សារព័ត៌មាន The Guardian បែបនេះ៖ “ខ្ញុំចូលចិត្តទស្សនាការលេងរបស់ Everton ជាពិសេសក្នុងទឹកដីរបស់ពួកគេ ដ្បិតមិនមែនជាក្លឹបដែលប្រជែងពានរង្វាន់ តែ Everton តែងតែបង្កើតភាពស្មុគស្មាញដល់បណ្តាក្លឹបធំៗ ដែលត្រូវប៉ះ ជារួមទៅខ្ញុំចូលចិត្តរបៀបប្រកួតប្រជែងរបស់ក្លឹបមួយនេះខ្លាំងណាស់”៕
ប្រភព៖ បរទេស