ក្លឹបកាំភ្លើងធំ Arsenal កំពុងបង្ហាញទម្រង់លេងយ៉ាងល្អនៅរដូវកាលនេះ ដោយគិតត្រឹមជុំទី ២៥ ពួកគេរកបាន ៤៨ ពិន្ទុ ឈរនៅលេខរៀងទី ៤ នាំមុខ ១ ពិន្ទុទៅលើ Man Utd ហើយក៏សល់ ៣ ជុំក្នុងដៃផ្សេងទៀតដែរ។ ប្រកួតបន្តបន្ទាប់របស់ក្រុមដឹកនាំដោយលោក Mikel Arteta នឹងត្រូវប៉ះ Leicester City, Liverpool និង Aston Villa ហើយបើក្រុមបន្តឈ្នះ នោះឱកាសក្តោបក្តាប់តំណែង Top 4 នឹងអាចមានដល់ ៧០ ភាគរយ។
តើអ្នកមានដឹងទេថា Arsenal ខកខានលេងពានអឺរ៉ុប Champions League អស់រយៈពេលប៉ុន្មានឆ្នាំហើយ? ចុះសារនេះ ប្រសិនជាក្លឹបមានមូលដ្ឋានក្នុងទីក្រុងឡុង អាចប្រជែងយកកៅអីពិតមែននោះ ចំពោះបណ្តាកីឡាករ នឹងទទួលបានប្រាក់លើកទឹកចិត្តប៉ុន្មាន?
បើតាមសារព័ត៌មាន Daily Mail ចុះផ្សាយថា ក្លឹប Arsenal នឹងចែកប្រាក់លើកទឹកចិត្តប្រមាណ ៥០០ ០០០ ផោន ឬជាង ៦៥០ ០០០ ដុល្លារទៅកាន់បណ្តាកីឡាករជាសមាជិកទាំងអស់ ប្រសិននៅបញ្ចប់រដូវកាលនាខែឧសភាខាងមុខ ក្លឹបអាចឈរនៅចំណាត់ថ្នាក់ Top 4 ជែងយកបានកៅអីលេង UCL រដូវកាលក្រោយ។
បន្ថែមពីប្រាក់ឧបត្ថម្ភខាងលើ ចំពោះកីឡាករមួយចំនួន ក៏នឹងដំណើរការផ្អែកទៅតាមកិច្ចព្រមព្រៀង ដែលសន្យានឹងដំឡើងថ្លៃពលកម្មជូន ក្រោយពួកគេអាចជួយក្លឹប ឲ្យបញ្ចប់រដូវកាលឈរនៅលេខរៀងទី ៤។ ជាក់ស្តែងដូចជាកីឡាករវ័យក្មេង ដែលកំពុងទទួលបានថ្លៃពលកម្មទាប តួយ៉ាង Emile Smith Rowe បានតែ ២០ ០០០ ផោន/សប្តាហ៍, Nuno Tavares បានតែ ២៧ ០០០ ផោន/សប្តាហ៍ និង Bukayo Saka បានតែ ៣០ ០០០ ផោន/សប្តាហ៍ ក៏រាប់បានជាឱកាសល្អសម្រាប់ពួកគេជាក់ជាមិនខាន។
យ៉ាងណាតាមការលើកឡើងរបស់អ្នកចាត់ការ លោក Arteta ក៏បានសង្កត់ធ្ងន់ថា លោកនឹងមិនមានការសង្ឃឹមខ្ពស់ ដោយគ្រាន់តែមើលលើការប្រកួតដែលក្រុមនៅសល់ច្រើនជាងគូប្រជែងនោះទេ។ អតីតដៃស្តាំរបស់ Pep និយាយ៖ “ខ្ញុំអត់បានមើលតារាងចំណាត់ថ្នាក់ ដោយសារតែយើងនៅសល់ប្រកួតក្នុងដៃច្រើនជាងគេនោះទេ ព្រោះអីយើងមានកាលវិភាគខុសៗគ្នា គ្រាន់ឈរលើគោលដៅតែមួយ ណាមួយលទ្ធផលពេលបន្ទាប់ទៀត ខ្ញុំក៏មិនអាចកំណត់បានដែរ”។
ដោយឡែកសម្រាប់ការប្រកួតប្រជែងពានអឺរ៉ុប Champions League សម្រាប់ក្លឹប Arsenal មិនធ្លាប់បានស្គាល់រសជាតិឈ្នះពានសូម្បីតែម្តង ដូចគ្នាទៅនឹង Man City អ៊ីចឹងដែរ។ ពួកគេបានចូលរួមការប្រកួត ១៩ សម័យកាល ធ្លាប់ឡើងដល់វគ្គផ្តាច់ព្រ័ត្រ កាលពីរដូវកាល ២០០៥/០៦ តែស្តាយភ្លាត់ចាញ់ Barcelona ១-២។
លើកចុងក្រោយដែល Arsenal មានឈ្មោះលេងនៅ UCL គឺរដូវកាល ២០១៦/១៧ ដែលសារនោះ ឡើងបានត្រឹមវគ្គ ១៦ ក្រុម។ នៅរយៈពេល ១០ ឆ្នាំចុងក្រោយ ក្រុមឡើងអស់ខ្ពស់ត្រឹមវគ្គ Knockout stage មួយនោះតែប៉ុណ្ណោះ ហើយ Bayern Munich និង Barcelona រាប់បានជាសត្រូវស៊ីសាច់ហុតឈាម ព្រោះធ្លាប់បានទម្លាក់កាំភ្លើងធំ រាប់ភ្លេចទៅហើយ៕