បន្ទាប់ការចាកចេញពីក្លឹប Atletico Madrid សម្រាប់ខ្សែការពារ Kieran Trippier បានប្រែមកក្លាយជាចំណែកសំខាន់របស់លោក Eddie Howe នៅក្លឹបសារិកាព្រៃ Newcastle United ជាក់ស្តែងបង្ហាញខ្លួន ៨ ប្រកួត រកបាន ២ គ្រាប់ហើយ គិតចាប់តាំងការផ្ទេរចូលនៅខែមករា ជាមួយតម្លៃខ្លួន ១២ លានផោន។
បញ្ជាក់កាលពីពេលកន្លងទៅ បុរសវ័យ ៣១ ឆ្នាំ បានមកនិយាយច្បាស់ៗថា រឿងលុយមិនមែនជាការសម្រេចចិត្តអាទិភាពក្នុងការផ្ទេរមក Newcastle នោះទេ ផ្ទុយទៅវិញ គឺដោយសារចង់នៅក្បែរគ្រួសារ និងចាប់អារម្មណ៍ពីផែនការណ៍ទៅថ្ងៃមុខរបស់ក្លឹប ទើបគេព្រមចាកចេញពីក្លឹបកាន់ឆ្នាំនៅទីក្រុង Madrid។
Trippier និយាយ៖ “សម្រាប់ខ្ញុំ រឿងគេនិយាយហ្នឹង អត់បានធ្វើឲ្យខ្ញុំឈឺចាប់អីទេ ព្រោះហេតុផលខ្ញុំមកអង់គ្លេស ខ្ញុំដឹងខ្លួនឯងច្បាស់ ព្រោះបើខ្ញុំសម្លឹងឃើញរឿងលុយ ខ្ញុំអាចបន្តនៅ Madrid ក៏បានដែរ តែនេះខ្ញុំចាប់អារម្មណ៍លើហេតុផលផ្សេង ជុំវិញការវិលមកអង់គ្លេស និងលេងនៅ Premier League”។
ខ្សែការពារខាងលើបន្ត៖ “ខ្ញុំចង់មករស់ក្បែរគ្រួសារ ក៏ដូចជាចាប់អារម្មណ៍លើចក្ខុវិស័យរបស់ក្លឹប ដូចគ្នាទៅនឹងអ្វីដែលម្ចាស់ក្លឹប ក៏ដូចជាអ្នកចាត់ការ គាត់បានគូសវាសគោលដៅដែលត្រូវទៅនៅពេលខាងមុខ ទាំងអស់នេះគឺពិតជាគួរឲ្យចាប់អារម្មណ៍ខ្លាំងណាស់”៕
ប្រភព៖ Goal