ក្លឹប Lazio ដែលដឹកនាំដោយអ្នកចាត់ការលោក Maurizio Sarri ហាក់ពេញចិត្តនឹងគុណភាពរបស់អ្នកចាំទី Kepa Arrizabalaga ដោយចង់នាំយកគេមកទឹកដីអ៊ីតាលី នៅរដូវកាល ២០២២/២៣ ដ្បិតអីសុពលភាពកុងត្រាជាមួយក្លឹបអាណាព្យាបាល Chelsea សព្វថ្ងៃ សេសសល់ដល់ចុងខែមិថុនា ឆ្នាំ ២០២៥។
បើតាមសារព័ត៌មាន Corriere dello Sport ចុះផ្សាយ លោក Sarri មើលឃើញសមត្ថភាពកីឡាករអេស្ប៉ាញ នៅតែល្អ ហើយក៏ចង់បានអ្នកចាំទីដៃថ្មី មកជំនួសតំណែង Pepe Reina ផងដែរ ព្រោះអីខ្ញីចាស់រូបនេះ ត្រូវផុតកុងត្រា រីឯវ័យក៏ហៀរជិតចូល ៤០ ឆ្នាំ។ Kepa នឹងមកប្រជែងតំណែងដៃទីមួយ ជាមួយកីឡាករសកម្មសព្វថ្ងៃ គឺ Thomas Strakosha។
បញ្ជាក់ថា Sarri និង Kepa ធ្លាប់សហការរួមគ្នា កាលនៅក្លឹបម្ចាស់ដី Stamford Bridge តែក៏ធ្លាប់មានរឿងរកាំរកូសនឹងគ្នាជាច្រើនសារដែរ។ ងាកទៅមើលតម្លៃផ្ទេរចេញរបស់ Kepa បន្តិច ប្រសិន Lazio ចង់យក គឺទំនងជាត្រូវចំណាយល្បាក់ ៨០ លានអឺរ៉ូ ហើយជាមួយថ្លៃពលកម្មគឺជិត ៨ លានអឺរ៉ូ/ឆ្នាំផ្សេងទៀត៕
ប្រភព៖ CdS