គ្រូបង្វឹករបស់ក្រុមយុវជនក្លឹប Shakhtar Donetsk បានស្លាប់បាត់ទៅហើយ ក្រោយពីលោកសម្រេចចិត្តចូលធ្វើទាហានច្បាំងជាមួយរុស្ស៊ី។
សង្គ្រាមដែលរុស្ស៊ីសម្រេចចិត្តឈ្លានពានទៅលើប្រទេសអ៊ុយក្រែនបានបន្ដមិនឈប់ឈរឡើយ។ រហូតមកដល់ពេលនេះ រុស្ស៊ីវាយយកក្រុងបានមួយហើយ ខណៈដែលទ័ពរបស់ពួកគេបន្ដរុលទៅមុខទៀត ដើម្បីវាយដណ្ដើមយកក្រុងគៀវឱ្យបាននៅប៉ុន្មានថ្ងៃខាងមុខនេះ។ ជាមួយការប្រឹងប្រយុទ្ធរបស់រុស្ស៊ីនេះដែរ ខាងអ៊ុយក្រែនឯណោះវិញ ក៏ប្រឹងការពារខ្លាំងណាស់ដែរ។ ពលរដ្ឋអ៊ុយក្រែន បានស្ម័គ្រចិត្តចូលធ្វើសង្គ្រាមជាច្រើន ដោយក្នុងនោះសូម្បីតែអ្នកកីឡាក៏ចូលទៅកាន់កាំភ្លើងផងដែរ។
យ៉ាងណាមិញ ប្រភពពីក្លឹប Shakhtar Donetsk បានបញ្ជាក់ថាមានសមាជិកក្លឹបម្នាក់បានស្លាប់ទៅហើយ ដោយសារតែចូលទៅធ្វើជាទាហានការពារទឹកដីនេះ។ ម្នាក់នោះ គឺគ្រូបង្វឹករបស់ក្រុមយុវជន ដែលបានចូលទៅប្រឆាំងជាមួយរុស្ស៊ីតាំងពីដំបូង។ គ្រូបង្វឹករូបនេះ ត្រូវបានគេដឹងថាស្លាប់ ដោយសារត្រូវគ្រាប់បំណែកដែលរុស្ស៊ីបាញ់ស្រោចមកលើក្រុងគៀវ៕ ប្រភព៖ Mirror