ក្រុមបិសាចក្រហម Manchester United បានដាក់គោលដៅយកខ្សែប្រយុទ្ធ Victor Osimhen របស់ក្រុម Napoli មករួមក្រុម ដើម្បីជំនួសតំណែងរបស់ Cristiano Ronaldo ។
ខ្សែប្រយុទ្ធវ័យ២២ឆ្នាំខាងលើ កំពុងបង្ហាញទម្រង់លេងល្អនៅក្រុម Napoli ដោយរកបាន១១គ្រាប់ក្នុងការបង្ហាញខ្លួន២២ប្រកួតនៅរដូវកាលនេះ បើទោះជារូបគេអវត្តមាន២ខែដោយសារបញ្ហារបួសក៏ដោយ។ ដោយសារតែមើលឃើញពីការធ្វើបានល្អនេះហើយ ទើបបានជាក្រុមបិសាចក្រហមចាប់អារម្មណ៍លើរូបគេ ព្រោះលេងល្អហើយនៅក្មេង ជាអ្វីដែលក្រុម Man Utd ចង់នាំចូល។ តែយ៉ាងណា តម្លៃខ្លួនរបស់ Osimhen នៅតែជាបញ្ហាដដែល ព្រោះមិនទាបនោះទេ។
យោងតាមប្រភពនៅអង់គ្លេស បញ្ជាក់ថាតម្លៃខ្លួនផ្ដាច់កុងត្រារបស់កីឡាករវ័យក្មេងខាងលើគឺ៨៤លានផោន។ នេះជាតម្លៃដែលក្រុម Napoli ចង់បាន ហើយក្លឹបណាយល់ព្រមតាមតម្លៃនេះ នឹងអាចយក Osimhen ទៅបានហើយនារដូវកាលដោះដូរកីឡាករខាងមុខ។ ដោយសារតែខ្ពស់យ៉ាងនេះហើយ ទើបបានជា Man Utd ស្ទាក់ស្ទើរចិត្តបន្ដិចដែរ ក្នុងការចរចាបន្ដ ដើម្បីយកគេមកជំនួស Ronaldo នៅរដូវកាលថ្មីខាងមុខ៕ប្រភព៖ DailyMail
