ក្លឹបស្តេចស Real Madrid ត្រូវបានគេរាយការណ៍ថា នឹងសម្រេចលក់ចេញ Luka Jovic នៅទីផ្សារដោះដូររដូវក្តៅខាងមុខ ហើយទំនងជានឹងបើកការចរចារវាងភាគីក្លឹប Arsenal ជាក្លឹបចង់បានកីឡាករស៊ែប៊ី ទៅកាន់ក្របខ័ណ្ឌ Premier League។
សម្រាប់ Jovic គេបានផ្ទេរចេញពី Frankfurt មកក្លឹបម្ចាស់ដី Bernabeu កាលពីឆ្នាំ ២០១៩ ហើយបង្ហាញខ្លួនសរុប ៤៩ ប្រកួត តែទើបរកបាន ៣ គ្រាប់ប៉ុណ្ណោះ។ ដ្បិតសុពលភាពកុងត្រា សេសសល់ដល់ចុងខែមិថុនា ឆ្នាំ ២០២៥ តែ Real គ្មានបំណងរក្សាទុកគេតទៅទៀតទេ ពោលនឹងចង់លក់ចេញ នៅតម្លៃល្បាក់ ២០ ទៅ ៣០ លានអឺរ៉ូ ដែលព្រមខាតពាក់កណ្តាល។
តាមសារព័ត៌មាន Fichajes ចុះផ្សាយថា ការដែលក្រុមដឹកនាំដោយប្រធានលោក Florentino Perez ចង់លក់ចេញ កីឡាករវ័យ ២៤ឆ្នាំ ក៏ដោយសារចង់បន្ធូរចន្លោះតំបន់ប្រយុទ្ធ ត្រៀមសម្រាប់នាំយក Kylian Mbappe និង Erling Haaland នាពេលខាងមុខផងដែរ។ រំឭកឲ្យដឹងថា ស្ថិតិឈរជើងនៅរដូវកាលនេះ Jovic លេងឲ្យ Real បានតែជិត ៥០០ នាទីប៉ុណ្ណោះ៕
ប្រភព៖ Fichajes