ក្រុមជម្រើសជាតិរុស្ស៊ី ក៏ដូចជាក្រុម Spartak Moscow ត្រូវបានដកចេញពីព្រឹត្តិការណ៍ប្រកួតបាល់ទាត់ពិភពលោក និងព្រឹត្តិការណ៍ពានអឺរ៉ូ Europa League ដែលជាការសម្រេចរបស់គណៈគ្រប់គ្រង UEFA&FIFA ជុំវិញការដាក់ទណ្ឌកម្មទៅលើប្រទេសរុស្ស៊ី។ នេះកើតឡើងបន្ទាប់ពីប្រទេសនៅតំបន់អឺរ៉ុបជាច្រើន កំពុងថ្កោលទោសទៅលើប្រទេសរុស្ស៊ី ដែលឈ្លានពានទៅលើប្រទេសអ៊ុយក្រែន។
ជាការឆ្លើយតបមកវិញ សហព័ន្ធបាល់ទាត់រុស្ស៊ីបានបង្ហាញការសោកស្តាយ និងរក្សាគោលជំហរប្រឆាំងដាច់ខាត ជុំវិញការសម្រេចចិត្តរបស់សមាគមទាំង ២ ខាងលើ ថាជាទង្វើល្មើសនឹងច្បាប់កីឡាអន្តរជាតិ។
សេចក្ដីថ្លែងការណ៍ចេញពី RFU បញ្ជាក់៖ “សហព័ន្ធបាល់ទាត់រុស្ស៊ីនឹងមិនយល់ស្របជាដាច់ខាត ជុំវិញការសម្រេចចិត្តរបស់ FIFA និង UEFA ក្នុងការព្យួរឈ្មោះក្រុមរុស្ស៊ីទាំងអស់ មិនឲ្យចូលរួមការប្រកួតអន្តរជាតិ នៅរយៈពេលមិនកំណត់ ដោយយើងជឿថា នេះជាទង្វើផ្ទុយពីបទដ្ឋាននិងគោលការណ៍នៃច្បាប់កីឡាអន្តរជាតិ ហើយបង្ហាញពីការបែងចែកសហគមន៍កីឡា ដែលកន្លងមកយើងតែងតែប្រកាន់ខ្ជាប់នូវគោលការណ៍សមភាព ការគោរពគ្នាទៅវិញទៅមក និងឯករាជ្យភាពពីនយោបាយ ដូច្នេះហើយយើងសូមរក្សាសិទ្ធ ប្រឆាំងនូវការសម្រេចចិត្តរបស់ FIFA និង UEFA ស្របតាមច្បាប់កីឡាអន្តរជាតិ”៕
ប្រភព៖ BeSoccer