អតីតកីឡាករនៅក្លឹប Chelsea លោក Frank Lebouef បានបង្ហាញការជឿជាក់ថា ជុំវិញការខកខានស៊ុតប៉េណាល់ទី នៅប្រកួតទល់ Liverpool សម្រាប់អ្នកចាំទី Kepa Arrizabalaga ពិតណាស់ នោះគឺជាបាបកម្ម ជាផលកើតចេញពីអំពើ ដែលគេបានធ្វើកាលឆ្នាំ ២០១៩ ក្រោយបដិសេធគ្រូមិនព្រមប្តូរចេញ កំឡុងវគ្គផ្តាច់ព្រ័ត្រនៅ EFL Cup ដូចគ្នា។
ជាការពិត ត្រលប់ទៅឆ្នាំ ២០១៩ សារនោះ Man City លេងស្មើទល់ Chelsea ០-០ ហើយដល់ពេលវគ្គស៊ុតប៉េណាល់ទី លោក Maurizio Sarri បានហៅឲ្យ Kepa ចេញ ដើម្បីជំនួសអ្នកចាំទីដៃទីពីរ Willy Caballero ចូល តែកីឡាករអេស្ប៉ាញបានបដិសេធ ហើយមិនព្រមដើរចេញពីទីលានឡើយ។ ទង្វើនេះ បានធ្វើឲ្យ Sarri ខឹងជាខ្លាំង ហើយលទ្ធផលបញ្ចប់ការប្រកួត ក៏ Chelsea ចាញ់ ៤-៣ ផងដែរ ក្រោយចប់ការស៊ុតប៉េណាល់ទី។
ងាកមកលោក Lebouef និយាយប្រាប់ ESPN FC ដូច្នោះថា៖ “ខ្ញុំអត់ចង់ចំអកទៅលើ Kepa អ្វីទេ តែនេះគឺជាបាបកម្មរបស់គេ អ្នកប្រហែលជាចាំហើយកាលគេបដិសេធអត់ប្តូរចេញកាលពីប៉ុន្មានឆ្នាំមុន រួចក៏ធ្វើឲ្យ Chelsea ចាញ់នៅវគ្គស៊ុតប៉េណាល់ទី ដូច្នេះខ្ញុំគិតថានេះជាផលដែលគេទទួលបានមកវិញ”។
លោកបន្ត៖ “យ៉ាងណាវាហាក់ដូចជាអយុត្តិធម៌សម្រាប់ Edouard Mendy ដែលគេបានជួយជម្រើសជាតិដល់ឈ្នះ AFCON ហើយក៏បានសង្រ្គោះបាល់ប៉េណាល់ទីខ្លះពីមុនមកដែរ ដូច្នេះវាមើលទៅដូចជាមិនសមទាល់តែសោះ ការដែលត្រូវដកគេចេញ តែយ៉ាងណាយើងមានតែទទួលយក”៕
ប្រភព៖ Sportskeeda