សហព័ន្ធកីឡាបាល់ទាត់ FIFA បានសម្រេចពិន័យក្រុមជម្រើសជាតិរុស្ស៊ី មិនឱ្យលេងប្រកួតជម្រុះ World Cup 2022 នោះទេ ក្រោយពីប្រទេសមួយនេះបន្ដការឈ្លានពានលើអ៊ុយក្រែនទៀត។
ដំបូងឡើយ FIFA និង UEFA គ្រាន់តែប្រាប់ឱ្យរុស្ស៊ីចូលរួមការប្រកួតនានាបាន ដោយគ្រាន់តែមិនអាចដាក់ទង់ជាតិលើអាវ និងចាក់ភ្លេងជាតិប៉ុណ្ណោះ។ តែក្រោយមកនៅយប់មិញនេះ ការដាក់ពិន័យក៏បានកែប្រែឡើងវិញទៀត។ FIFA បានសម្រេចដកជម្រើសជាតិរុស្ស៊ីចេញពីការប្រកួតជម្រុះ World Cup 2022 តែម្ដង ហើយក៏មិនឱ្យលេងប្រកួតអន្ដរជាតិផ្សេងទៀតដែរ។
ដោយឡែកខាង UEFA វិញ ក៏បានដកក្លឹបនៅរុស្ស៊ីទាំងអស់មិនអាចចូលលេងពានរង្វាន់ប្រចាំទ្វីបអឺរ៉ុបបានទេ។ នេះជាទណ្ឌកម្មធ្ងន់ធ្ងរមែនទែនសម្រាប់វិស័យបាល់ទាត់រុស្ស៊ី ហើយវាក៏នឹងធ្វើឱ្យក្លឹបនៅរុស្ស៊ីបាត់ចំណូលជាច្រើនផងដែរ៕ប្រភព៖ DailyMail
