អនាគតរបស់ Lionel Messi ជាមួយក្លឹប Paris Saint-Germain ដ្បិតបើសេសសល់ដល់ចុងខែមិថុនា ឆ្នាំ ២០២៣ តែក៏មិនប្រាកដថាលោកនឹងចាកចេញមុនកាលកំណត់ ឬបែបណាដែរ។ តែឥឡូវយើងទទួលបានដំណឹងពីក្លឹបនៅសហរដ្ឋអាមេរិកហើយ ដោយបើកទ្វាររង់ចាំបុរសវ័យ ៣៤ ឆ្នាំយ៉ាងកក់ក្តៅជាទីបំផុត។
ឈ្មោះជាកំពូលកីឡាករលំដាប់ពិភពលោក ដូច្នេះក្លឹបណាក៏ប្រាថ្នាចង់បាន Messi ដែរ តែមួយក្នុងចំណោមនោះ គឺ Inter Miami ក៏បានផ្សារភ្ជាប់មកកាន់កីឡាករខាងលើ ជាច្រើនខែមកហើយ។ ថ្ងៃនេះតាមការបញ្ជាក់ ពីសហស្ថាបនិកក្លឹប លោក Jorge Mas ក៏បាននិយាយថា៖ “Leo Messi នៅតែបន្តជាកីឡាករល្អបំផុតមួយក្នុងលោក រួចខ្ញុំគិតថា David [Beckham] ក៏មានទំនាក់ទំនងខ្លះជាមួយនឹងគេផងដែរ”។
លោកបន្ត៖ “ដូច្នេះហើយប្រសិនជា Messi ត្រូវចាកចេញពី PSG នោះនៅពេលវេលានោះ ក្រុមរបស់យើងក៏នឹងរីករាយក្នុងការស្វាគមន៍វត្តមានរបស់គេ ឲ្យមកលេងនៅ Inter Miami និងក្លាយជាផ្នែកមួយនៃសហគមន៍របស់យើងផងដែរ សួរថាវាអាចទៅរួចឬអត់? ចាំមើលទៅ យើងនឹងជំរុញឲ្យកាន់តែខ្លាំង ពោលគឺវាអាចកើតឡើងទៅបាន”៕
ប្រភព៖ Sportsmole