សម្រាប់ព្រឹត្តិការណ៍ប្រចាំទ្វីបអាស៊ី ដែលធ្វើឡើងរៀងរាល់ ៤ ឆ្នាំម្តង គឺ AFC Asian Cup នៅឆ្នាំ ២០២៣ គឺបានកំណត់យកប្រទេសចិនធ្វើជាម្ចាស់ផ្ទះ ហើយគិតមកទល់ពេលនេះ រកបានក្រុមចំនួន ១៣ ហើយដែលធានាកៅអីផ្លូវការ។ ក្នុងនោះមានដូចជាចិន ជប៉ុន ស៊ីរី កាតារ កូរ៉េខាងត្បូង អូស្រ្តាលី អ៊ីរ៉ង់ អារ៉ាប់រួម អារ៉ាប៊ីសាអូឌីត អ៊ីរ៉ាក់ អូម៉ង់ វៀតណាម និងលីបង់។
បញ្ជាក់ថា ពានរង្វាន់ដែលស្ថិតក្រោមការគ្រប់គ្រងរបស់ AFC គឺជាពានប្រចាំទ្វីបដែលមានអាយុកាលចំណាស់ជាងគេ ដល់ទៅ ៦៦ ឆ្នាំបន្ទាប់ពីពាន Copa America នៅប៉ែកអាមេរិកឡាទីន។ កាលពីព្រឹត្តិការណ៍សារមុន កាតារបានក្លាយជាក្រុមឈ្នះជើងឯក ខណៈដែលជប៉ុន ជាក្រុមឈ្នះច្រើនលើកបំផុត ដល់ទៅ ៤ សម័យកាល។
ងាកមកក្រុមគោព្រៃកម្ពុជារបស់យើងវិញ គឺនៅសល់ឱកាសចុងក្រោយ ក្នុងការប្រជែងយកកៅអីឆ្ពោះទៅព្រឹត្តិការណ៍នៅឆ្នាំ ២០២៣ តាមរយៈការប្រកួតវគ្គជម្រុះ ជុំទី ៣ ដែលទើបតែចាប់ឆ្នោតរកឃើញក្រុមត្រូវប៉ះគ្នាកាលពីប៉ុន្មានថ្ងៃមុន។
ជម្រើសជាតិដែលស្ថិតក្រោមការដឹកនាំដោយអ្នកចាត់ការលោក Keisuke Honda កំណត់ត្រូវជួបហុងកុង ឥណ្ឌា និងអាហ្វហ្គានីស្ថាន។ កាលបរិច្ឆេទប្រកួតធ្វើឡើងនៅចន្លោះថ្ងៃទី ៨ ដល់ ១៤ មិថុនា ឆ្នាំ ២០២២ នៅឯរាជធានី Kolkata ប្រទេសឥណ្ឌា។
ងាកមកក្នុងអត្ថបទនេះ ទំព័រ CTS Sports សូមធ្វើការរំឭកឡើងវិញ នូវប្រវត្តិធ្លាប់ប៉ះគ្នារវាងក្រុមទាំង ៣ ដោយចង់ដឹងថា តើកម្ពុជាធ្លាប់ហែលកាត់ជោគជ័យឬបរាជ័យបែបណាខ្លះ?
១) កម្ពុជា ទល់ ហុងកុង
សរុបទាំងប្រកួតមិត្តភាព និងផ្លូវការ ក្រុមទាំងពីរធ្លាប់ជួបគ្នា ៦ លើក ដោយកម្ពុជាមិនធ្លាប់ស្គាល់ពាក្យថា ឈ្នះ នៅឡើយ ពោលចាញ់ ៥ និងស្មើ ១។ លើកដំបូងប៉ះគ្នានៅពាន Merdeka Tournament ដែលហុងកុងយកឈ្នះ ៦-២ ហើយលើកចុងក្រោយនៅវគ្គជម្រុះបឋម FIFA World Cup កាលពីឆ្នាំ ២០១៩ ដែលជើងទី ១ ស្មើ ១-១ ហើយជើងទី ២ ចាញ់ ២-០។
បើទៅមើលប្រវត្តិធ្លាប់ប៉ះគ្នានៅពានប្រចាំទ្វីប AFC Asian Cup ក៏ធ្លាប់តតាំងគ្នា ២ លើកផងដែរ ហើយក្រុមគោព្រៃ ចាញ់នៅលទ្ធផល ៤-១ និង ១-០។
២) កម្ពុជា ទល់ អាហ្វហ្គានីស្ថាន
ធ្លាប់ប៉ះគ្នា ៤ លើក ឈ្នះ ១ ចាញ់ ៣ ដោយរួមមាន កាលនៅវគ្គជម្រុះបឋម World Cup កាលពីឆ្នាំ ២០១៥ ដែលសរុបទាំងពីរជើង គោព្រៃ ចាញ់ ៤-០។ រួចនៅ Asian Cup ក៏ធ្លាប់ជួបគ្នាពីរជើងផងដែរ កាលពីឆ្នាំ ២០១៧ និង ២០១៨ ជាវគ្គជម្រុះបឋមជុំទី ៣ ដូចសារនេះអ៊ីចឹង ដោយលទ្ធផលជើងទី ១ នៅកីឡដ្ឋានជាតិអូឡាំពិក កម្ពុជា ឈ្នះ ១-០ លុះទៅដល់ជើងទី ២ បែរចាញ់ ២-១ វិញ។
១) កម្ពុជា ទល់ ឥណ្ឌា
នៅ ១០ ឆ្នាំចុងក្រោយ កម្ពុជាជួបឥណ្ឌា តែ ១ លើកគត់ កាលនៅប្រកួតមិត្តភាព ឆ្នាំ ២០១៧ សារនោះ ឥណ្ឌាយកឈ្នះ ៣-២។ សរុបស្ថិតិជារួម គឺជួបគ្នា ៤ លើក កម្ពុជា ទទួលលទ្ធផល ចាញ់ ៣ និងឈ្នះ ១។
ជ័យជម្នះដែលខាងក្រុមរបស់យើង ធ្លាប់ធ្វើបាន គឺកាលនៅវគ្គជម្រុះបឋម Asian Cup ដែលកម្ពុជា បានយកឈ្នះ ៣-១ តែកាលពីឆ្នាំ ១៩៦៧ ឯណោះ៕
ប្រភព៖ 11v11