នៅជើងទី ១ ក្នុងទឹកដីប្រទេសអេស្ប៉ាញ ក្លឹប Atletico Madrid បានបញ្ចប់ត្រឹមលទ្ធផលស្មើ ១-១ ទល់ក្លឹប Man Utd ហើយវិលទៅជើងទី ២ ត្រូវលេងនៅខែក្រោយ សម្រាប់លោក Diego Simeone បានជឿជាក់ថា ក្លឹបម្ចាស់ផ្ទះ ប្រាកដណាស់នឹងលេងវាយសម្រុកជាងមុន។
និយាយក្រោយចប់ការប្រកួត គ្រូនៃក្លឹបអេស្ប៉ាញប្រាប់ថា៖ “យើងនៅតែស្ថិតក្នុងតំណែងដដែល ទាំងមុននិងក្រោយការប្រកួត គ្មានអ្វីផ្លាស់ប្តូរទេ ដោយការលេងជើងទី ២ នៅមុខអ្នកគាំទ្ររបស់ពួកគេ [United] ពួកគេពិតណាស់ នឹងលេងវាយសម្រុកជាងមុន ប្រើប្រាស់ល្បឿនលេងលឿនជាងមុន ដូចដែលបង្ហាញនៅ Premier League អ៊ីចឹងដែរ”។
លោកបន្ត៖ “តែយ៉ាងណា វាក៏ជាការប្រកួតដ៏ធំមួយនៅកីឡដ្ឋានដ៏អស្ចារ្យ ហើយការដដែលមានគូប្រជែងដូចជា Man Utd នៅ Champions League គឺរាប់បានជាការសាកល្បងសមត្ថភាពដែលអ្នកគួរតែឆ្លងកាត់”។
បញ្ជាក់ថា សម្រាប់ការប្រកួតជើងទី ២ នឹងមិនមានគិតគូរគ្រាប់បាល់ក្រៅដី ឬ Away Goal អ្វីនោះទេ ដូច្នេះបើស្មើ ០-០ គឺថែមម៉ោង ១៥ នាទីពីរដង ឬឈានដល់ការស៊ុតប៉េណាល់ទីកាត់សេចក្តី។ យ៉ាងណាបើ United ឬ At អាចស៊ីត្រឹម ១-០ នោះគឺអាចឡើងទៅវគ្គបន្ទាប់ហើយ៕
ប្រភព៖ Metro