Luis Suarez នឹងផុតសុពលភាពកុងត្រានៅចុងខែមិថុនា ឆ្នាំ ២០២២ ខាងមុខ ដែលគេជឿថា ក្លឹប Atletico Madrid នឹងមិនផ្តល់កុងត្រាថ្មីតទៅទៀតទេ សម្រាប់កីឡាករអ៊ុយរុយហ្គាយ ព្រោះពេលចុងក្រោយទម្រង់លេងហាក់ធ្លាក់ចុះ ហើយកត្តាអាយុរបស់គេក៏កាន់តែចំណាស់ស្រាប់ផង។
ផ្ទុយទៅវិញតាមសារព័ត៌មាន Todofichajes ចុះផ្សាយ ក្លឹបក្នុងទីក្រុង Madrid បានចាប់អារម្មណ៍ទៅលើខ្សែប្រយុទ្ធក្រៅជម្រើសនៃក្លឹប PSG គឺ Mauro Icardi ពោលចង់នាំយកបុរសវ័យ ២៩ ឆ្នាំ ចេញពីទឹកដីប្រទេសបារាំងនៅរដូវក្តៅខាងមុខ។
សម្រាប់ Icardi គេមិនទទួលបានពេលវេលាលេងជាប់លាប់ដូចមុនទេ ក្រោយការមកដល់របស់ Lionel Messi។ រដូវកាលនេះ គេឈរជើងលើទីលានបានតែជាង ១ ២០០ នាទី និងទើបតែរកបាន ៥ គ្រាប់ប៉ុណ្ណោះ។ ជាមួយសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៤ ក៏នាំឲ្យតម្លៃខ្លួន អាចជាថ្លៃល្បាក់ ៣០ លានអឺរ៉ូ។
គួររំឭកថា Icardi គេធ្លាប់ជាអតីតយុវជនថ្នាលឲ្យក្លឹបគូប្រជែង At គឺ Barcelona មុនគេផ្ទេរទៅលេងឲ្យក្លឹបនៅឯអ៊ីតាលី កាលពីឆ្នាំ ២០១១៕ ប្រភព៖ Todofichajes