ក្លឹបមាន់ខ្នាយមាស Tottenham Hotspur ត្រូវបានគេរាយការណ៍ថា កំពុងចាប់អារម្មណ៍ក្នុងការចង់លក់ចេញ កីឡាករលេងប្រយុទ្ធស្លាប Steven Bergwijn នៅទីផ្សារដោះដូររដូវក្តៅខាងមុខ ជាមួយនឹងតម្លៃទាបជាងទីផ្សារ ដើម្បីពន្លឿនល្បឿននៃការបង្វែរចំណូលចូលក្លឹប។
កីឡាករសញ្ជាតិហូឡង់ ហាក់ត្រូវបានក្លឹប Ajax ចាប់ចិត្ត ព្រោះគេមានបទពិសោធន៍ស្រាប់ ធ្លាប់លេងឲ្យលីគកំពូលនៅទីនោះ តែជាមួយក្លឹបគូប្រជែងគឺ PSV។ ស្ថិតិរដូវកាលនេះ Bergwijn ឈរជើងលើទីលាន បានតែ ៧៣៤ នាទីគត់។
បើតាមសារព័ត៌មាន Calciomercato ចុះផ្សាយថា Spurs នឹងព្រមដាក់លក់កីឡាករលេងតំណែងប្រយុទ្ធខាងលើ នៅតម្លៃទាបតែ ១៥ លានផោនប៉ុណ្ណោះ ហើយយកលុយនោះទៅបង្គ្រប់ការទិញផ្តាច់កុងត្រា Dejan Kulusevski នៅពេលខាងមុខវិញ។ រំឭកថា Bergwijn គេបានមកចូលរួមជាមួយ Spurs នៅរដូវរងា ឆ្នាំ ២០២០ ដោយការលក់ចេញសារនេះ គឺមុនផុតកំណត់ត្រាកុងត្រា រយៈពេលជាង ៣ ឆ្នាំឯណោះ៕
ប្រភព៖ Calciomercato