RB Salzburg រាប់ថាធ្វើបានល្អហើយ កាលពីជើងទី ១ នៅដី Bayern Munich អាចលេងយកស្មើលទ្ធផល ១-១។ យ៉ាងណាការប្រកួត នៅជើងទី ២ នាថ្ងៃទី ៩ មិនា នឹងជាពេលវេលាកាត់សេចក្ដីសម្រេចយកក្រុមឡើងទៅកាន់វគ្គបន្ត។
មុនឈានដល់ការប្រកួត សម្រាប់ក្រុមនៅប្រទេសអូទ្រីសក៏ទទួលបានដំណឹងអាក្រក់ ក្រោយការរាតត្បាតខ្នាតធំនៃជំងឺ COVID-19 ដោយនាំឲ្យបណ្តាកីឡាករ និងបុគ្គលិកប្រមាណ ១៥ នាក់ តេស្តឃើញវិជ្ជមាន។ នេះមុនរយៈពេលតែ ២ សប្តាហ៍ប៉ុណ្ណោះ នឹងឈានដល់ការប្រកួតទល់ Bayern ជាថ្មី។
បើតាមការបញ្ជាក់ពីក្លឹប អ្នកទាំងអស់នោះបានដាក់ខ្លួនដាច់ដោយឡែក និងរង់ចាំតាមដានស្ថានភាពបន្តទៅទៀត [មិនមានការបញ្ជាក់ឈ្មោះកីឡាករណាខ្លះឡើយ]។ រយៈពេល ២ សប្តាហ៍រាប់ទាំងការហ្វឹកហាត់ផង អាចថាមិនជារឿងងាយស្រួលឡើយ ណាមួយពួកគេក៏សកម្មខ្លាំង នឹងការប្រកួតនៅលីគ ដោយត្រូវមានភារកិច្ចប៉ះ LASK នាថ្ងៃអាទិត្យនេះទៀត៕
ប្រភព៖ AF