កៅអី Top 4 សម្រាប់លេងពានអឺរ៉ុប UEFA Champions League រដូវកាលក្រោយ សម្រាប់ក្លឹប Manchester United មិនទាន់អាចធានាបាននោះទេ ដ្បិតអីការប្រកួត ទើបតែឈានមកដល់ជុំទី ២៦ ពោលនៅខ្វះ ១២ ជុំទៀត។ គិតត្រឹមពេលនេះ ក្រុមដឹកនាំដោយលោក Ralf Rangnick ឈរលេខ ៤ មាន ៤៦ ពិន្ទុ នាំមុខក្រុមលេខ ៥ តែ ៤ ពិន្ទុប៉ុណ្ណោះ។
យ៉ាងណាបើតាមសារព័ត៌មាន ESPN ចុះផ្សាយថា ក្លឹបបិសាចក្រហម នឹងនៅតែបន្តសកម្មភាពចរចាកីឡាករគោលដៅសំខាន់ ២ រូបមាន Harry Kane ពីក្លឹប Tottenham Hotspur និង Declan Rice ពីក្លឹប West Ham បើទោះបីពេលទៅមុខ លទ្ធផលបញ្ចប់រដូវកាល កើតឡើងខុសពីការរំពឹងទុក។
ក្លឹបត្រៀមលុយជាង ២០០ លានផោន លើការនាំយកអ្នកទាំងពីរ ព្រោះអី Kane អាចល្បាក់ ១០០ លានផោន ហើយ Rice អាចឡើងដល់ ១២០ លានផោន ប្រសិនបន្តលេងល្អ ដល់បញ្ចប់រដូវកាល ២០២១/២២។ យ៉ាងណាក្រៅពីការនាំចូលកីឡាករ ក្លឹបក៏ត្រូវមានការសម្រេចចិត្តដ៏សំខាន់ ជុំវិញការនាំយកអ្នកចាត់ការថ្មី រវាងបេក្ខភាពលោក Mauricio Pochettino, Erik ten Hag ឬ Luis Enrique ផងដែរ៕
ប្រភព៖ ESPN