ក្រុម U23 វៀតណាម ដែលប៉ះក្រុមទីម័រល្ងាចនេះ នៅសល់គ្នាត្រឹមតែ១៣នាក់ប៉ុណ្ណោះ ក្រោយពីមានកីឡាករម្នាក់ចុងក្រោយតេស្ដវិជ្ជមានកូវីដ១៩ដែរ។
វៀតណាម ក្រោយពីប្រកួតជាមួយក្រុមថៃមក ក៏រកឃើញមានវិជ្ជមានកូវីដ១៩បន្ថែមទៀតចំនួន៧នាក់។ ដោយចំនួននេះ តម្រូវឱ្យពួកគេត្រូវនាំយកកីឡាករថ្មីថែម៤នាក់ទៀតមកពីវៀតណាម ហើយពេលនេះពួកគេក៏មកដល់កម្ពុជាហើយដែរ ដោយជិះឡានក្រុងមក។ នៅពេលនេះ ក្រុម U23 វៀតណាម នៅសល់គ្នា១៣នាក់ ដើម្បីត្រៀមប្រកួតជាមួយក្រុមទីម័រ ដែលពោរពេញដោយកីឡាករ និងបានត្រៀមខ្លួនរួចជាស្រេចតែម្ដង។
ក្នុងពានរង្វាន់ AFF U23 Championship នេះ វៀតណាម ប្រឹងប្រែងខ្លាំងណាស់។ បើទោះជាក្រុមឆ្លងកូវីដ១៩ច្រើនយ៉ាងណាក៏ដោយ ក៏ពួកគេមិនបោះបង់ដែរ ពោលគឺនៅតែកោះហៅកីឡាករមកពីស្រុក មកប្រកួតជានិច្ច បើទោះជាមានឆ្លងច្រើននិងខ្វះខាតកីឡាករយ៉ាងណាក៏ដោយ។ គិតត្រឹមពេលនេះ កីឡាករដែលវៀតណាមកោះហៅថ្មីមក មាន១០នាក់ទៅហើយ៕ ប្រភព៖ Zingnews