Real Madrid បានបរាជ័យក្រោមលទ្ធផល ០-១ កាលពីប្រកួតជើងទី ១ វគ្គ ១៦ ក្រុម ទល់ PSG នៅឯទីក្រុងប៉ារីស។ យ៉ាងណាវិលមកជើងទី ២ នៅឯ Bernabeu នាថ្ងៃទី ១០ មិនាខាងមុខ សម្រាប់ក្រុមម្ចាស់ផ្ទះ ក៏មិនមានក្តីសង្ឃឹមច្រើននោះដែរ។
ក៏ដោយសារតែក្រុមដឹកនាំដោយលោក Carlo Ancelotti នឹងត្រូវអវត្តមានកីឡាករសំខាន់ ២ រូប មានខ្សែការពារស្លាប Ferland Mendy និងខ្សែបម្រើការពារ Casemiro។ មិនមែនមកពីរបួស តែនេះពួកគេជាប់ពិន័យ ១ ប្រកួត ដោយសាររងពិន័យកាតលឿង ៣ លើក នៅព្រឹត្តិការណ៍ទោលរបស់ UEFA។
បញ្ជាក់ឲ្យដឹងបន្តិច សម្រាប់ច្បាប់នៅពានអឺរ៉ុប Champions League ឬ Europa League ក្តី គឺ UEFA កំណត់ថា បើកីឡាករណារងពិន័យកាតលឿងដល់សន្លឹកទី ៣ នោះពួកគេនឹងត្រូវព្យួរឈ្មោះនៅប្រកួតបន្ទាប់។
ជុំវិញរឿងនេះដែរ អាចថាជាការសម្រេចចិត្តខុសរបស់អ្នកចាត់ការសញ្ជាតិអ៊ីតាលី ព្រោះបើយើងរំឭកទៅរឿងចាស់កាលពីខែវិច្ឆិកា នៅប្រកួតវគ្គចែកពូល គឺកីឡាករ Casemiro ផ្ទាល់ បានគិតគូររួចជាស្រេច ថាមានចេតនាចង់បង្កកំហុសយកកាតលឿងទី ៣ ដើម្បី Clear កាតឲ្យហើយ ជៀសវាងមកជាប់ជំពាក់ ក្លាយជាបញ្ហាដូចកើតមាននៅវគ្គ ១៦ ក្រុមកន្លងទៅ។
Casemiro asked ancelloti to take a yellow card against sherrif so that he enters the Knockouts with a clean record but he declined, Now #14 suspended for the 2nd Leg. pic.twitter.com/kb7T1iMG1O
— 🦇 (@RxmosBlanco) February 16, 2022
ខ្សែបម្រើសញ្ជាតិប្រេស៊ីល បានកាតលឿងសន្លឹកទី ១ និងទី ២ កាលពីជុំទី ១ និងទី ៤ ហើយមកដល់ជុំទី ៥ ទល់ Sheriff នៅខែវិច្ឆិកា ជាពេលដែលកៅអីឆ្លងទៅវគ្គបន្ទាប់ សម្រាប់ Real បានធានា ១០០ ភាគរយហើយនោះ គេក៏បានដើរទៅខ្សឹបប្រាប់អ្នកចាត់ការលោក Ancelotti ថាប្រកួតសារនេះ ចង់មានចេតនាបង្កកំហុស ដើម្បីទទួលកាតលឿងទី ៣ នោះនៅប្រកួតជុំទី ៦ វគ្គចែកពូល គេនឹងត្រូវ UEFA ព្យួរឈ្មោះ ហើយមកដល់វគ្គ ១៦ ក្រុម ចំនួនកាតនឹងត្រូវបាន Clear ហើយរាប់សារជាថ្មី។ យ៉ាងណាលោក Ancelotti បានគ្រវីក្បាល ហើយឆ្លើយថា៖ “ទេ” ជាដាច់ខាត។
ដល់តែមកដល់ប្រកួតបើកឆាកវគ្គ ១៦ ក្រុម ជើងទី ១ ទល់ PSG ភ្លាម បុរសវ័យ ២៩ ឆ្នាំ ក៏ស្រាប់តែរងពិន័យកាតលឿងទី ៣ ភ្លែត ក្រោយជ្រុលជ្រួសបង្កកំហុសធ្ងន់ទៅលើកីឡាករក្រុមគូប្រជែង Leandro Paredes។ នេះសបង្ហាញថា ការសម្រេចចិត្តរបស់អ្នកចាត់ការក៏មិនសុទ្ធតែត្រូវរហូតនោះដែរ ហើយអ្នករាល់គ្នាក៏ប្រហែលជាអាចយល់ច្បាស់ហើយ ថាហេតុអ្វីនៅការប្រកួតខ្លះ កីឡាករមានចេតនាចង់ទទួលបានកាតលឿង។
គួររំឭកថា សម្រាប់ការប្រកួតវគ្គ ១៦ ក្រុម ឬ Knockout stage នៅរដូវកាលនេះ នឹងពុំមានការគិតគ្រាប់បាល់ក្រៅដីអ្វីទៀតនោះទេ ដូច្នេះមានន័យថា លទ្ធផលដែលអាចសម្រេចឲ្យ Real Madrid ឈោងបានកៅអីវគ្គផ្ដាច់ព្រ័ត្រ គឺលុះត្រាតែយកឈ្នះទៅលើ PSG ២-០ ជាចាំបាច់។ ប្រសិនណាឈ្នះបានត្រឹម ១-០ ឬ ២-១ នោះនឹងត្រូវបន្ថែមម៉ោង ១៥ នាទីពីរដង ឬឈានដល់ការស៊ុតប៉េណាល់ទី ហើយលទ្ធផលដែលអាចទម្លាក់ក្លឹបម្ចាស់ជើងឯក ១៣ សម័យកាលបាន សម្រាប់ PSG គឺងាយ ដោយទាមទារឲ្យទប់បានត្រឹម ០-០ នោះគឺជោគជ័យហើយ៕
ប្រភព៖ បរទេស