ក្លឹប Real Madrid បានចាប់ផ្ដើមស្នើតម្លៃខ្លួនរបស់ខ្សែប្រយុទ្ធ Erling Haaland ជាថ្មីម្ដងទៀតហើយ ក្រោយពីពួកគេបានព្យាយាមជាច្រើនលើកមកហើយកាលពីរដូវកាលមុន។
ក្រុមរបស់លោក Carlo Ancelotti គឺជាបេក្ខភាពមួយដែលបានព្យាយាមទិញយកកីឡាករ Haaland ជាយូរមកហើយ តែចុងក្រោយក៏មិនអាចយកបានព្រោះក្រុម Dortmund មិនព្រមលក់ទាល់តែសោះ។ រហូតមកដល់ពេលនេះ ប្រភពនៅអេស្ប៉ាញបានបញ្ជាក់ថាក្រុមអធិរាជស ចាប់ផ្ដើមស្នើទិញជាថ្មីទៀតហើយ ដោយធ្វើយ៉ាងណាឱ្យបានលឿនជាងក្រុមគូប្រជែង Barcelona និង Manchester City ។ ដោយមានការបង្ហើបទៀតថា ភ្នាក់ងារទីផ្សាររបស់កីឡាករន័រវែស ក៏បានជួបជាមួយក្រុមការងាររបស់ Real Madrid ហើយដែរ។
Haaland ត្រូវបានក្លឹបជាច្រើនចាប់អារម្មណ៍ចាប់តាំងពីរូបគេផ្លាស់មកលេងនៅ Dortmund កាលពី២ឆ្នាំមុន។ អំឡុងពេល២រដូវកាលមកនេះ រូបគេបង្ហាញខ្លួនបាន៥៧ប្រកួត និងរកបាន៥៦គ្រាប់ទៅហើយ ដែលនេះជាកំណត់ត្រាខ្ពស់បំផុតមួយ៕ប្រភព៖ DailyMail
