ក្លឹបក្នុងទីក្រុងប៉ារីស ពិតជាមិនចង់បាត់បង់កីឡាករ Kylian Mbappe នោះទេ ជាពិសេសក្រោយឃើញការលេងដ៏លេចធ្លោរបស់គេ នៅពេលប្រកួតទល់ក្លឹប Real Madrid កាលពីជើងទី ១ UCL កន្លងទៅ។ បើទោះបីសុពលភាពកុងត្រាសេសសល់ជាង ៤ ខែ តែភាគីក្លឹបហាក់នៅតែសកម្ម ក្នុងការរិះរកវិធី ថាធ្វើបែបណា ដែលអាចចងជើងកីឡាករបារាំងឲ្យបន្តនៅតទៅទៀត។
បើតាមសារព័ត៌មាន The Independent ចុះផ្សាយ ក្លឹបចង់ដំឡើងថ្លៃពលកម្មថ្មីឲ្យ Mbappe ឡើងក្លាយជាកីឡាករស៊ីថ្លៃបំផុតក្នុងលោក ពោលអាចរកបាន ១ លានអឺរ៉ូ/សប្តាហ៍។ ទំហំនេះច្រើនជាងអស់កីឡាករទាំងឡាយ មិនថាតែ Cristiano Ronaldo, Neymar Jr ឬ Lionel Messi។
វាជាទំហំប្រាក់ពលកម្មដែលសឹងតែច្រើនជាង សំណើ R.Madrid ចង់ផ្តល់ឲ្យកីឡាករវ័យ ២៣ ឆ្នាំទៅទៀត។ ជឿថា នេះប្រាកដជានឹងធ្វើឲ្យការសម្រេចចិត្តរបស់កីឡាករមានការរារែកហើយ ណាមួយទម្រង់លេងរបស់ក្លឹបអធិរាជស ពេលចុងក្រោយក៏មិនជាលេចធ្លោខ្លាំងដូចមុន ដូច្នេះការសម្រេចចិត្តផ្ទេរទៅក្លឹបអេស្ប៉ាញ មិនអាចធានាពីជោគជ័យនៅពានអឺរ៉ុបនោះទេ៕
ប្រភព៖ The Independent