បើទោះបីការប្រកួត ទើបតែឈានមកដល់ជុំទី ២២ សម្រាប់ក្លឹបមាន់ខ្នាយមាស Tottenham Hotspur តែសម្រាប់លោក Antonio Conte បានបញ្ជាក់ជាមុនហើយ ថាក្តីសង្ឃឹម នឹងបាន Top 4 នៅបញ្ចប់រដូវកាល គឺមានតែ ១ ភាគរយទេ។ បញ្ជាក់ Spurs ឈរលេខ ៨ មាន ៣៦ ពិន្ទុ ចាញ់ ៧ ពិន្ទុ ធៀបនឹង Man Utd ដែលឈរលេខ ៤ តែលេងដល់ជុំទី ២៥។
និយាយមុនការប្រកួតដ៏សំខាន់ ត្រូវប៉ះក្រុមឈរនៅកំពូលតារាង គឺ Man City នាចុងសប្តាហ៍ ស្រាប់តែអ្នកចាត់ការសញ្ជាតិអ៊ីតាលី និយាយ៖ “ខ្ញុំនិយាយរួចហើយ ខ្ញុំមានសង្ឃឹមតែ ១ ភាគរយទេ នឹងអាចបញ្ចប់រដូវកាលនៅចំណាត់ថ្នាក់ Top 4 ព្រោះអីកម្រិតនៃលីគមួយនេះ គឺខ្ពស់ខ្លាំងណាស់ ដោយវាមិនមានចន្លោះច្រើនទេសម្រាប់ក្រុមដទៃ ក្រៅតែពីក្រុមកំពូលៗ”។
កន្លងទៅ លោក Conte ក៏បាននិយាយពីហេតុផលដែលធ្វើឲ្យក្រុមចុះខ្សោយផងដែរ នោះគឺដោយសារទីផ្សារដោះដូររដូវក្តៅ ដែលក្លឹបលក់ចេញកីឡាករច្រើន តែបែរជាមិនបាននាំចូលត្រលប់មកប៉ះប៉ូវវិញ។ ជាមួយការធ្លាក់ចុះនេះដែរ ក៏នាំឲ្យគេសង្ស័យថា តំណែងគ្រូវ័យ ៥២ ឆ្នាំ ប្រហែលនឹងមិនបានគង់វង្សយូរទេ ដ្បិតអីសុពលភាពនៅសេសសល់រយៈពេល ១៦ ខែទៀត៕
ប្រភព៖ Metro