ក្លឹប Real Madrid ហាក់ធ្លាក់ក្តីសង្ឃឹម ក្នុងការយក Kylian Mbappe មកចូលរួមនៅទឹកដីអេស្ប៉ាញ បន្ទាប់បរាជ័យក្រោមលទ្ធផល ០-១ កាលពីថ្ងៃមុន ទល់ក្លឹបបារាំង PSG។ ក្រោយចប់ការប្រកួត មានដំណឹងគួរឲ្យចាប់អារម្មណ៍ថា Mbappe ទំនងជានឹងបន្តនៅ ហើយបើចាកចេញ ក៏គិតគូរជ្រើសយកក្លឹបនៅលីគកំពូលអង់គ្លេសដែរ ក្រោយឃើញទម្រង់លេងរបស់អធិរាជស មើលទៅមិនសូវជាល្អ។
យ៉ាងណាបើតាមការចុះផ្សាយពី Sport បានឲ្យដឹងថា ក្លឹបដឹកនាំដោយប្រធានលោក Florentino Perez ហាក់ថយក្រោយមួយជំហានវិញហើយ ពោលនឹងមិនត្បុរទៅមុខទៀតទេ រឿងចង់បាន Mbappe។ ផ្ទុយទៅវិញ ក្លឹបបានដាក់សំណើទៅក្លឹប Borussia Dortmund ជុំវិញការចង់បាន Erling Haaland ជំនួសវិញ។
បញ្ជាក់ថា Mbappe បើ Real យកបាន គឺយកនៅលក្ខខណ្ឌឥតតម្លៃខ្លួន រីឯ Haaland អាចជាថ្លៃ ៦៨ លានផោន ផ្អែកតាមតម្លៃផ្តាច់កុងត្រាបានកំណត់។ យ៉ាងណាក៏លឺថា វត្តមានកីឡាករន័រវេស អាចនឹងប៉ះពាល់ដល់ការឈរជើងរបស់ Karim Benzema ដូច្នេះរឿងនេះ គឺនឹងកាន់តែស្មុគស្មាញ ប្រសិនជា Mbappe មិនព្រមចុះចូលជាមួយក្លឹប Real ពិតមែន៕
ប្រភព៖ SPORT