បន្ទាប់ពីស្មើទល់ក្លឹប Burnley និង Southampton ងាកមកប្រកួតសារនេះ ទល់ Brighton ក្លឹបបិសាចក្រហម Man Utd បែរជាបង្កើតលទ្ធផលប្លែកភ្នែក ដោយយកឈ្នះ ២-០ នាំឲ្យក្រុមបន្ថែម ៣ ពិន្ទុ លោតចូលតារាង Top 4 សារជាថ្មី។ បច្ចុប្បន្នក្រុមដឹកនាំដោយអ្នកចាត់ការលោក Ralf Rangnick មាន ៤៣ ពិន្ទុ គិតត្រឹមជុំទី ២៥ នាំមុខទៅលើក្រុមញញួរ ២ ពិន្ទុ។
ប្រកួតនៅឯ Old Trafford ទើបបញ្ចប់មុននេះ កាលពីតង់ទី ១ ខាងក្រុមភ្ញៀវ Brighton ហាក់ដាក់សម្ពាធខ្លាំង ដោយប៊ិះតែនឹងកើតមានគ្រាប់បាល់ លុះចូលដល់តង់ទី ២ ក្រុមម្ចាស់ផ្ទះបែរជាវាយបកបានយ៉ាងល្អ ត្រលប់មកវិញ ហើយគ្រាប់បាល់នាំមុខក៏កើតឡើងនៅនាទី ៥១ ធ្វើបានដោយ Cristiano Ronaldo។
តែយ៉ាងណាដល់នាទី ៥៤ ខាងក្រុម Brighton ក៏ត្រូវបាត់បង់កីឡាករ Lewis Dunk ដោយរងពិន័យកាតក្រហម។ រហូតដល់នាទី ៩៦ កៀកនឹងបញ្ចប់ការប្រកួតទៅហើយ ការលេង ១០ ទល់ ១១ ក៏បន្ថែមឱកាសឲ្យ Bruno Fernandes អាចជ្រែកយកគ្រាប់បាល់ទីពីរឲ្យក្លឹប។ ស្ថិតិជារួម United ស៊ុត ១៩ លើក ចំគោលដៅ ៧ លើក រីឯ Brighton ស៊ុត ១០ លើកចំគោលដៅ ៣ លើក៕