ប៉ុន្មានប្រកួតចុងក្រោយ Man Utd ធ្វើមិនសូវបានល្អនោះទេ ដោយប៉ះក្រុមគីឡូមធ្យម ដូចជា Newcastle, Aston Villa, Burnley និង Southampton គឺបានត្រឹមស្មើ ហើយថែមទាំងលេងចាញ់ Wolves ០-១ ថែមទៀត។ គិតត្រឹមជុំទី ២៤ បិសាចក្រហមឈរលេខរៀងទី ៥ មាន ៤០ ពិន្ទុ ដែលនេះក៏មិនទាន់អាចធានានោះដែរ ពីកៅអី Top 4 ព្រោះអីក្រុមនៅពីក្រោយដូចជា Arsenal និង Tottenham ក៏សល់ប្រកួតច្រើនក្នុងដៃ។
ប្រកួតសេសសល់សម្រាប់ខែកុម្ភៈ គឺមានជំនួបសំខាន់មួយដែល Man Utd ត្រូវប៉ះ Atletico Madrid រាប់ជាគូធំ ប្រចាំខែ លេងនៅវេលាម៉ោង ០៣:០០ នាទីទាបភ្លឺ ឈានចូលថ្ងៃទី ២៤ កុម្ភៈ ជាប្រកួតជើងទី ១ វគ្គ ១៦ ក្រុម UCL មានផ្សាយផ្ទាល់លើទំព័រ CTS Sports។ យ៉ាងណាបើបង្វែរទៅការប្រកួតនៅខែបន្ទាប់ គឺខែមិនា នោះក៏នឹងកាន់តែដាក់សម្ពាធខ្លាំង សម្រាប់ក្លឹបម្ចាស់ដី Old Trafford ព្រោះសុទ្ធត្រូវប៉ះក្រុមគីឡូធ្ងន់រយៈពេលមួយខែពេញ។
១) Man City ទល់ Man Utd
បើកទំព័រថ្មី ខែមិនា ក្រុមដឹកនាំដោយអ្នកចាត់ការលោក Ralf Rangnick នឹងត្រូវជួប ក្រុមដឹកនាំដោយលោក Pep Guardiola គឺក្លឹប Manchester City នៅវេលាម៉ោង ១១:៣០ នាទីយប់ ថ្ងៃទី ៦ មិនា។ នេះជាការជួបក្រុមឈរកំពូលតារាង ប្រចាំលីគ ដោយលទ្ធផលកាលពីជើងទី ១ លេងនៅដី Old Trafford ម្ចាស់ផ្ទះ បរាជ័យ ០-២។ ចុះចំណែកជើងទី ២ នៅ Etihad វិញ គ្នាយើងទាយថា Man Utd ឬជា Man City ដែលនឹងយកបាន ៣ ពិន្ទុ?
២) Man Utd ទល់ Tottenham
រំលងរយៈពេលមួយសប្តាហ៍ បិសាចក្រហមក៏នឹងត្រូវបើកកីឡដ្ឋានស្វាគមន៍ក្រុមមាន់ខ្នាយមាស Tottenham Hotspur នៅវេលាម៉ោង ១២:៣០ នាទីរំលងអាធ្រាត្រ ឈានចូលថ្ងៃទី ១៣ កុម្ភៈ មានផ្សាយផ្ទាល់លើទំព័រ CTS Sports។
ការពិតទៅ គីឡូ Spurs និង Man Utd នៅរយៈពេលចុងក្រោយ រាប់ថាមិនលើសខ្វះគ្នានោះឡើយ តែយ៉ាងណាកាលពីជើងទី ១ នៅកីឡដ្ឋានក្នុងទីក្រុងឡុង ម្ចាស់ផ្ទះបានបរាជ័យ ០-៣ ក្រោមថ្វីជើងក្រុមភ្ញៀវ United។
៣) Man Utd ទល់ Atletico Madrid
លទ្ធផលជើងទី ១ យើងមិនទាន់ដឹងថានឹងបែបណាទេ តែកាលវិភាគប្រកួតជើងទី ២ គឺសម្រេចនឹងធ្វើឡើងនៅឯ Old Trafford នាវេលាម៉ោង ០៣:០០ នាទីទាបភ្លឺ ឈានចូលថ្ងៃទី ១៦ មិនា។ នេះរាប់បានជាប្រកួតកាត់សេចក្ដី ថា United នឹងអាចឈោងយកកៅអី ឆ្ពោះទៅវគ្គ ៨ ក្រុម UCL បានឬយ៉ាងណា។
១) Liverpool ប៉ះ Man Utd
រំលងការលេងទល់ At តែរយៈពេល ៤ ថ្ងៃ ក្លឹប Man Utd នឹងត្រូវដើរតួជាក្រុមភ្ញៀវ ទៅចូលជួបម្ចាស់ដី Anfield នៅវេលាម៉ោង ១១:៣០ នាទីយប់ ថ្ងៃទី ២០ មិនា មានផ្សាយផ្ទាល់លើទំព័រ CTS Sports។ លទ្ធផលកាលពីជើងទី ១ ក្នុងដីរបស់ United ត្រូវបានហង្សបកស្បែកបិសាចដល់ទៅ ៥ គ្រាប់ ចុះងាកមកជើងទី ២ នេះវិញ តើអ្នកគិតថាបិសាចអាចវាយបកយកឈ្នះដែរឬទេ?
ប្រភព៖ បរទេស