កាលពីព្រឹត្តិការណ៍ FIFA World Cup 2018 នៅឯប្រទេសរុស្ស៊ី សម្រាប់ការប្រកួតកីឡាបាល់ទាត់ ក៏បានទទួលនូវការប្រើប្រាស់បច្ចេកវិទ្យាថ្មី ឲ្យឈ្មោះថា VAR ឬ Video Assistant Referee មុនត្រូវបានពង្រាយដាក់ឲ្យប្រើប្រាស់ នៅតាមក្របខ័ណ្ឌនៃប្រទេសជាច្រើនទៀតទូទាំងសកលលោក។
យ៉ាងណាងាកមក World Cup 2022 ដែលត្រូវធ្វើឡើងនៅឯប្រទេសកាតា នាចុងឆ្នាំខាងមុខ ក៏ត្រៀមនឹងបើកសម្ភោធនូវបច្ចេកវិទ្យាថ្មីស្រឡាង ចំនួន ២ ផ្សេងទៀតផងដែរ នោះគឺបច្ចេកវិទ្យា SAOT និង 3D Animations។ តើវាគឺជាអ្វី ហើយអាចនាំប្រយោជន៍ថ្មីអ្វីខ្លះ សម្រាប់វិស័យបាល់ទាត់? តុះទៅលម្អិតនៅខាងក្រោមជាមួយ CTS Sports៖
១) SAOT
កាលពីប៉ុន្មានសប្ដាហ៍មុន ផ្ទុះដំណឹងមកថា ការងារជាអាជ្ញាកណ្ដាលខ្សែបន្ទាត់អាចនឹងត្រូវបាត់បង់ ហើយជំនួសមកវិញដោយការប្រើប្រាស់មនុស្សយន្ត ឬ Robots ឲ្យវិនិច្ឆ័យជំនួស។ យ៉ាងណាតាមការបញ្ជាក់លម្អិតពីប្រធានអាជ្ញាកណ្ដាលរបស់ FIFA លោក Pierluigi Collina បានសង្កត់ធ្ងន់ថា នោះមិនមែនជាមនុស្សយន្តទេ ផ្ទុយទៅវិញ វាគឺជាបច្ចេកវិទ្យាដែលជំនួយ និងគាំទ្របន្ថែមដល់ការសម្រេចចិត្តរបស់អាជ្ញាកណ្ដាលលើទីលាន និងជំនួយការអាជ្ញាកណ្ដាលតែប៉ុណ្ណោះ ហើយការងារជាអាជ្ញាកណ្ដាលខ្សែបន្ទាត់ គឺនៅតែរក្សាដដែល។
និយាយឲ្យខ្លីទៅ បច្ចេកវិទ្យាក្រៅជំហរពាក់កណ្ដាលស្វ័យប្រវត្តិ ឬ SAOT គឺវាស្រដៀងនឹង VAR ដូច្នោះដែរ ដោយប្រៀបដូចជាប្រព័ន្ធថ្មីមួយ ដែលប្រើប្រាស់កាមេរ៉ាច្រើនជាង ១០ គ្រឿង ទៅចាប់យកសកម្មភាព អវយវៈរបស់កីឡាករ មានដូចជាដៃ ជើង ដែលកំពុងរត់លើទីលាន ហើយសម្រេចចេញជាទិន្នន័យច្បាស់ការមួយ ចាយពេលតែប៉ុន្មានវិនាទី រួចបញ្ជូនសញ្ញាទៅកាន់អាជ្ញាកណ្ដាលខ្សែបន្ទាត់ និងអាជ្ញាកណ្ដាលធំឲ្យបានដឹង។
បើកាន់តែស៊ីជម្រៅទៅ វាស្រដៀងនឹង Goal Line Technology ដោយពេលណាបាល់ចូលទី ការជូនដំណឹងទៅកាន់អាជ្ញាកណ្ដាលនឹងកើតឡើងភ្លែត រីឯ SAOT បើកាលណាបាល់មើលឃើញថា ក្រៅជំហរ ឬ Offside នោះនឹងបញ្ជូនសញ្ញាភ្លាមៗដូចគ្នា។
បើសួរថា តើវាផ្ដល់ប្រយោជន៍អ្វីខ្លះ សម្រាប់ការប្រកួតបាល់ទាត់? នោះគឺ មានប្រយោជន៍ធំ ២ ទី ១) ត្រង់ថា ស្ថិតនៅពេលវេលាលំបាកខ្លះ ក៏ដូចជាអាជ្ញាកណ្ដាលខ្សែបន្ទាត់ រត់មិនទាន់កីឡាករ នោះក៏នឹងបានបច្ចេកវិទ្យា SAOT ធ្វើជាជំនួយ ហើយទី ២) គឺវាសន្សំសំចៃពេលវេលាជាងមុន ដោយនេះបើក្នុងស្ថានភាពតានតឹងខ្លាំង ក៏អាជ្ញាកណ្ដាលមិនចាំបាច់ដើរទៅមើល VAR ចុះឡើងដូចមុនដែរ ពោលរង់ចាំតែប៉ុន្មានវិនាទី គឺទទួលបានចម្លើយហើយ។
២) 3D Animations
វាផ្សារភ្ជាប់គ្នាទៅនឹងបច្ចេកវិទ្យា SAOT ដោយគ្រាន់ថានេះ គឺផ្តល់ទស្សនីយភាពប្លែកភ្នែកថ្មី សម្រាប់អ្នកគាំទ្រនៅក្នុងកីឡដ្ឋាន និងតាមកញ្ចក់ទូរទស្សន៍ជាពិសេស។ សព្វថ្ងៃការបង្ហាញព័ត៌មាន អំពីបាល់ក្រៅជំហរ Offside គឺគេប្រើប្រាស់ 2D Lines ពោលត្រឹមតែផ្តិតរូបភាពកីឡាករ បន្ថែមនឹងខ្សែបង្ហាញពីបាល់ក្រៅជំហរ តែពេលទៅមុខ នឹងមានរូបភាពដូចជានៅក្នុងហ្គេម ដោយជំនួសកីឡាករ ទៅជាតួអង្គ Animations ហើយបង្ហាញការសម្រេចចិត្តពីលទ្ធផលបាល់ក្រៅជំហរនៅកម្រិតច្បាស់ត្រជាក់ភ្នែក ទៅលើអេក្រង់ក្នុងកីឡដ្ឋាន ក៏ដូចជាបង្ហាញមកកាន់អ្នកទស្សនាតាមរយៈកញ្ចក់ទូរទស្សន៍។
ដូច្នេះមានន័យថា ពេលបច្ចេកវិទ្យា SAOT សម្រេចចេញជាទិន្នន័យមួយហើយ នោះវានឹងរៀបចំបម្លែងទៅជា 3D Animations ដូចក្នុងពិភពថ្មីមួយ ដើម្បីឲ្យអ្នកទស្សនាបានយល់ច្បាស់ថា បាល់នោះ Offside ឬ Onside បែបណា។ កាន់តែច្បាស់ កុំភ្លេចរង់ចាំតាមដានការប្រើប្រាស់បច្ចេកវិទ្យាថ្មីទាំង ២ ខាងលើ នៅ World Cup ចុងឆ្នាំនេះ ជាមួយ CTS Sports ទាំងអស់គ្នា៕
ប្រភព៖ FIFA