លោក Xavi អ្នកចាត់ការក្រុម FC Barcelona បានចេញមុខមកសុំទោសជំនួសកីឡាករ Araujo ដែលបានបង្ហាញកាយវិការមិនសមរម្យដាក់កីឡាកររបស់ក្រុម Espanyol នៅជិតចប់ការប្រកួត។
ជំនួបរវាងក្រុមនៅតំបន់កាតាឡាន់ខាងលើបានបញ្ចប់ទៅដោយលទ្ធផលស្មើគ្នា ២-២។ ក្នុងនោះ មុនចប់ការប្រកួតក៏មានការប៉ះទង្គិចគ្នាច្រើនផងដែរ ដែលតម្រូវឱ្យអាជ្ញាកណ្ដាលចាយកាតក្រហមអស់៣សន្លឹកឯណោះ ទៅលើក្រុម Espanyol ២សន្លឹក និងក្រុម Barcelona ១សន្លឹក។ ខណៈដែលក្នុងពេលនោះ Araujo កីឡាកររបស់ក្រុមអ្នកមានបុណ្យដែលត្រូវប្ដូរចេញនោះ ក៏បានប្រើពាក្យសម្ដីមិនសមរម្យពេលកីឡាករ Espanyol ដើរចេញផងដែរ។
ដោយ Araujo លើកដៃ២ បង្ហាញថាក្រុម Espanyol នេះសមទៅលេងនៅលីគលំដាប់ទី២នៅឆ្នាំ២០២២នេះ។ ដោយសារតែចំណុចនេះហើយ ទើបបានជាលោក Xavi ចេញមុខមកសុំទោសជំនួស និងបាននិយាយថាលោកមិនបានឃើញពេលនោះទេ តែយ៉ាងណាក្នុងនាមជាអ្នកកីឡា ត្រូវគោរពដល់ភាគីទាំងសងខាង មិនត្រូវមើលងាយអ្វីនោះទេ៕ ប្រភព៖ Football-Espana