ក្លឹបបិសាចក្រហម Manchester United នៅរយៈពេលចុងក្រោយ ហាក់កាន់តែធ្លាក់ចុះខ្លាំង ដោយគិតត្រឹមជុំទី ២៣ ពួកគេឈរនៅលេខរៀងទី ៦ មាន ៣៩ ពិន្ទុ។ នេះក៏បន្ថែមសម្ពាធ នាំឲ្យឱកាសរក្សាតំណែង Top 4 ដើម្បីលេង UCL រដូវកាលក្រោយ កាន់តែពិបាកខ្លាំងឡើង។
យ៉ាងណាងាកមក អនាគតរបស់កំពូលកីឡាករ Cristiano Ronaldo ឯណេះ បើទោះបីជាសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៣ តែក៏មានភាគរយ ដែលកីឡាករអាចនឹងចាកចេញ ត្រឹមទីផ្សារដោះដូររដូវក្តៅខាងមុខ ជាពិសេស ប្រសិនណា United ខកខានឱកាសលេងពានអឺរ៉ុប ក៏ដូចជាការមកដល់របស់អ្នកចាត់ការ លោក Mauricio Pochettino ហើយនាំយកកីឡាករចំណូលថ្មី ដែលប៉ះពាល់ Role បច្ចុប្បន្នរបស់ខ្លួន។
បើតាមការចុះផ្សាយរបស់សារព័ត៌មាន The Telegraph បានឲ្យដឹងថា បេក្ខភាពអនាគតអ្នកចាត់ការ Pochettino បានសម្លឹងឃើញគោលដៅមួយរូបរួចជាស្រេច នោះគឺអតីតកូនក្រុមនៅឯក្លឹបមាន់ខ្នាយមាស Tottenham Hotspur កីឡាករ Harry Kane។
គ្រូសញ្ជាតិអាហ្សង់ទីន ចង់បាន Kane ឲ្យមកលេងនៅតំណែងប្រយុទ្ធកណ្តាល ដូច្នេះ Ronaldo ប្រាកដជានឹងរងផលប៉ះពាល់ ព្រោះនេះ ជា Role ហ្សីនរបស់ CR7 នៅពេលបច្ចុប្បន្ន។ អ៊ីចឹងហើយ ប្រសិនកីឡាករព័រទុយហ្គាល់ គិតថាមិនចង់ធ្វើជាស្រមោល ឬមិនចង់ប្តូរ Role ទៅលេងប្រយុទ្ធស្លាបខាងឆ្វេងវិញ នោះការចាកចេញ ប្រាកដជានឹងអាចកើតឡើង។
គួរបញ្ជាក់ថា កីឡាករអង់គ្លេស Kane សេសសល់សុពលភាពកុងត្រាជាមួយក្លឹបមានមូលដ្ឋានក្នុងទីក្រុងឡុង ដល់ចុងខែមិថុនា ឆ្នាំ ២០២៤។ ជុំវិញតម្លៃផ្ទេរចេញ អាចជាថ្លៃចន្លោះ ១០០ ទៅ ១១០ លានផោន។ ស្ថិតិរដូវកាលនេះ កីឡាករវ័យ ២៨ ឆ្នាំ បង្ហាញខ្លួន ៣២ ប្រកួត រកបាន ១៥ គ្រាប់និង Assist ៣ លើក។
បន្តពីរឿងនេះដែរ បើកាលណា Ronaldo ត្រូវដើរចេញពី Old Trafford នោះទ្រនំបន្ទាប់ គឺអាចជាក្លឹប Paris Saint-Germain ដែលវានឹងនាំឲ្យការរួបរួមរវាង Ronaldo/Messi អាចកើតឡើងនៅរដូវកាលក្រោយ។
ក៏ដោយសារតែ ប្រសិនណា Pochettino ចុះចេញពីតំណែងនៅ PSG នោះ អ្នកចាត់ការលោក Zinedine Zidane ក៏មានភាគរយនឹងមកដឹកនាំបន្ត ហើយក៏មានចចាមអារ៉ាមថាគ្រូសញ្ជាតិបារាំង ចាប់អារម្មណ៍ចង់បានអតីតកូនក្រុមចាស់ Ronaldo ខ្លាំងណាស់ផងដែរ។ អតីតគ្រូ Real ចង់រៀបប្រព័ន្ធប្រយុទ្ធ ដោយប្រើប្រាស់ Neymar នៅស្លាបឆ្វេង Messi នៅស្លាបស្តាំ និង Ronaldo នោប្រយុទ្ធកណ្តាល ក្នុងគោលដៅត្រួសត្រាយក្លឹប PSG ឲ្យមានមុខមានមាត់នៅពានរង្វាន់អឺរ៉ុប។ នេះបើតាមសារព័ត៌មាន Marca បានចុះផ្សាយ។
ក៏ប៉ុន្តែ បើអ្នកឆ្ងល់ថា តើ PSG អាចឆ្លងផុតច្បាប់ហិរញ្ញវត្ថុ FFP ដោយរបៀបណា បើបន្ថែមការនាំយក Ronaldo? ចម្លើយ៖ គឺដោយសារការចាកចេញរបស់ Kylian Mbappe ដូច្នេះចន្លោះនៃការចំណាយទៅលើយុវជនបារាំង នឹងត្រូវបង្វែរមកផ្តល់ឲ្យកីឡាករព័រទុយហ្គាល់ ឬយ៉ាងច្រើន វ៉ៃចេញកីឡាករ ១ ទៅ ២ រូប បន្ថែមគឺជាការស្រេច៕
ប្រភព៖ បរទេស