ខ្សែការពារ Andy Robertson បានសរសើរមិនដាច់ពីមាត់ ដល់គុណភាពរបស់ខ្សែប្រយុទ្ធ Diogo Jota បន្ទាប់ពីរកគ្រាប់បាល់ ជួយក្រុមយកឈ្នះទៅលើ Leicester City ២-០ កាលពីយប់មិញ នៅក្របខ័ណ្ឌ Premier League។
Liverpool កាន់តែបន្ថែមការប្រដេញពិន្ទុ Man City ដោយគិតត្រឹមជុំទី ២៣ នៅក្រោយមេឃខៀវមួយប្រកួត ពួកគេចាញ់ ៩ ពិន្ទុ ពោលហង្សមាន ៥១ ពិន្ទុ រីឯមេឃខៀវ មាន ៦០ ពិន្ទុ។ យ៉ាងណាងាកទៅមើលជ័យជម្នះយប់មិញ Robertson បាននិយាយប្រាប់ BT Sport បែបនេះ៖ “គេ [Diogo] លែងមាននរណាបញ្ឈប់បានហើយពេលនេះ ដោយយើងមានអារម្មណ៍ថា យើងស្ថិតក្នុងការគ្រប់គ្រងដ៏ល្អមួយ ហើយពេលយើងលេងដោយមាន Jota គឺយើងតែងមានទំនុកចិត្ត ហើយជឿជាក់ថា គេអាចរកគ្រាប់បាល់បាន”។
លោកបន្តថា៖ “យើងកំពុងស្ថិតក្នុងការប្រកួតពានរង្វាន់ដល់ទៅ ៤ តែយ៉ាងណាយើងនៅតែបន្ថែមសម្ពាធដល់ City វាជារឿងសំខាន់សម្រាប់ពួកយើង ការដែលអាចរកបាន ២ គ្រាប់និងមិនឲ្យមានគ្រាប់បាល់ចូលទី យើងកំពុងបោះជំហានទៅមុខទៀតហើយ”៕
ប្រភព៖ BT Sport