បើទោះបីក្លឹប Man Utd យកបាន Cristiano Ronaldo តែទៅមើលទម្រង់លេងជារួម ហាក់មិនមានភាពល្អប្រសើរទាល់តែសោះ ដោយពេលចុងក្រោយ លេងប៉ះក្រុមមធ្យមជួនខ្លះក៏ឈ្នះទាំងតឹងចិត្ត ហើយខ្លះលេងបានត្រឹមតែស្មើគ្រាប់បាល់ក៏មាន។
បើតាមការយល់ឃើញរបស់អតីតជើងចាស់នៅហង្ស លោក Dietmar Hamann បានបញ្ជាក់ថា ក៏ដោយសារតែកីឡាករ United មួយចំនួន លេងមិនអស់ពីខ្លួន លេងបណ្តើរ ខ្លាច Ronaldo បណ្តើរ ទើបមើលទៅមិនស៊ីចង្វាក់គ្នាបែបនេះ។
Hamann ពន្យល់ប្រាប់សារព័ត៌មាន Metro បែបនេះ៖ “ចម្ងល់ត្រង់ថា កីឡាករក្នុងក្រុម ហេតុអ្វីលេងដូចជាខ្លាច Ronaldo នេះខ្ញុំអត់មើលឃើញភាពរួបរួមរបស់ United នោះទេ ដែលមើលទៅ នាំឲ្យកីឡាករខ្លះ ពិបាកនឹងសម្របខ្លួន ដូច្នេះត្រូវប្រាកដថា កីឡាករទាំងអស់ ឈរលើទិសដៅតែមួយ នោះទើបជាត្រឹមត្រូវ”។
បញ្ជាក់ថា គិតត្រឹមជុំទី ២៣ សម្រាប់ក្រុមដឹកនាំដោយលោក Ralf Rangnick ឈរនៅចំណាត់ថ្នាក់ទី ៦ មាន ៣៩ ពិន្ទុស្មើនឹងក្រុម Arsenal [នៅសល់ ១ ប្រកួតក្នុងដៃ]។ ជុំបន្ទាប់សម្រាប់បិសាចក្រហម ពួកគេត្រូវទៅប៉ះ Southampton នៅយប់ស្អែក ម៉ោង ០៧:៣០ នាទី មានផ្សាយផ្ទាល់លើទំព័រ CTS Sports៕
ប្រភព៖ Marca