ក្រុមជម្រើសជាតិសេណេហ្គាល់ បានយកឈ្នះទៅលើអេហ្សីប តាមរយៈលទ្ធផលបាល់កាត់សេចក្តីប៉េណាល់ទី ៤-២ នៅវគ្គផ្ដាច់ព្រ័ត្រ ពានរង្វាន់ប្រចាំទ្វីបអាហ្វ្រិក AFCON 2021។
នេះបានធ្វើឲ្យអ្នកគាំទ្រក្លឹប Liverpool មានអារម្មណ៍សាទរ ពាក់កណ្តាល សោកស្តាយពាក់កណ្តាល ព្រោះអីម្ខាង Mohamed Salah ស្ថិតនៅជម្រើសជាតិអេហ្សីប ម្ខាង Sadio Mane ស្ថិតនៅក្រុមលើកពានសេណេហ្គាល់។
យ៉ាងណាតាមការបញ្ជាក់ពីកីឡាករឈ្នះជើងឯក Mane បានបង្ហើបពីពាក្យសម្តី ដែលគេដើរទៅខ្សឹបលួងលោម Salah បន្ទាប់ចប់ការប្រកួតបែបនេះថា៖ “ខ្ញុំបានប្រាប់ទៅ Salah ថាគាត់នៅតែជាកីឡាករដ៏ល្អម្នាក់ ហើយខ្ញុំពិតជារីករាយដែលបានរួមក្លឹបជាមួយនឹងគាត់”។
ខ្សែប្រយុទ្ធសេណេហ្គាល់បន្ត៖ “ខ្ញុំពិតជាមានការគោរពខ្លាំងណាស់សម្រាប់ Salah ដោយគាត់បានផ្តល់គ្រប់យ៉ាងសម្រាប់ប្រទេសមួយនេះ តែយ៉ាងណាសោកស្តាយដែលគាត់មិនទទួលបានជ័យជម្នះ តែវាក៏មិនមានន័យថា ជាទីបញ្ចប់នៃអាជីពរបស់គាត់នោះដែរ”៕
ប្រភព៖ Sportskeeda