ធ្លាប់តែល្បីល្បាញ មានគេទទួលស្គាល់ពីសមត្ថភាព និងតម្លៃខ្លួនខ្ពស់លើទីផ្សារដោះដូរ តែកីឡាករ ៣ រូបដូចបង្ហាញក្នុងអត្ថបទនេះ ក៏ស្រាប់តែស្រុតចុះមួយរំពេច ក្រោយខ្សត់ឱកាសបង្ហាញខ្លួនលើទីលាន គួបផ្សំនឹងបញ្ហាផ្ទាល់ខ្លួនឯទៀត។
ដំណោះស្រាយចុងក្រោយ កីឡាករទាំងនោះ ក៏មានតែផ្លាស់ទៅទ្រនំថ្មី ដោយទើបតែសម្រេចទម្លាក់ចុងប៊ិចចុះហត្ថលេខា កាលពីខែមករា កំឡុងទីផ្សារដោះដូររដូវរងាកន្លងទៅនេះ។ តាមការប្រមើលមើល CTS Sports ជឿថា អ្នកទាំង ៣ នោះ ប្រាកដជានឹងមានឱកាសអាចស្រោចស្រង់អាជីពត្រលប់មកវិញជាក់ជាមិនខាន៖
៣) Christian Eriksen
បន្ទាប់ពីជួបបញ្ហាបេះដូង នៅកំឡុងការលេងឲ្យជម្រើសជាតិដាណឺម៉ាក ខ្សែបម្រើវ័យ ២៩ ឆ្នាំ ក៏ត្រូវបានក្លឹប Inter Milan ប្រកាសបញ្ចប់អាជីព មុនកុងត្រាកំណត់។ ក៏ដោយសារតែច្បាប់នៅអ៊ីតាលី សម្រេចមិនអនុញ្ញាតឲ្យអត្តពលិក ដែលមានបំពាក់ថ្មជំនួយបេះដូង (ICD) អាចបន្តអាជីពបានទេ។
ក្រោយផ្អាកឈរជើងលើទីលានជិតកន្លះឆ្នាំ Eriksen ក៏ទទួលបានឱកាសសារជាថ្មី នៅក្លឹប Brentford ក្នុងក្របខ័ណ្ឌ Premier League។ ដ្បិតទទួលបានសុពលភាពកុងត្រាត្រឹម ៦ ខែ តែនេះរាប់បានជាឱកាសដ៏មានតម្លៃ ព្រោះអី ប្រសិន Eriksen អាចបង្ហាញទម្រង់លេងល្អលើទីលាន នោះឱកាសទៅជួយជម្រើសជាតិ នៅ World Cup 2022 ក៏រំពឹងនឹងអាចទទួលបាន ហើយការលេងឲ្យក្លឹបកំពូលណាមួយនាពេលបន្ទាប់ ក៏នឹងសង្ឃឹមដូចគ្នា។
២) Donny van de Beek
ធ្លាប់ជាគ្រាប់ពេជ្រដ៏មានតម្លៃរបស់ក្លឹប Ajax លុះក្រោយផ្ទេរមក Man Utd សម្រាប់ខ្សែបម្រើ Van de Beek គឺប្រៀបបានដូចជាដុំថ្ម ដែលគេសឹងតែភ្លេចឈ្មោះ។ តំណែងរបស់កីឡាករហូឡង់ ត្រូវបានគ្របជិតឈឹង ដោយ Bruno Fernandes និងកីឡាករមួយចំនួនផ្សេងទៀត ហើយមិនថាក្រោមការដឹកនាំរបស់លោក Ole Gunnnar Solskjaer ក្តី ឬ Ralf Rangnick ក្តី ក៏គេនៅតែមិនទទួលបានឱកាស។
ផ្លូវចុងក្រោយ ខ្សែបម្រើវ័យ ២៤ ឆ្នាំ ក៏បានសម្រេចការផ្ទេរនៅលក្ខខណ្ឌខ្ចីជើង មកកាន់ក្លឹប Everton។ សមត្ថភាពប៉ុន Van de Beek គេជឿថា អ្នកចាត់ការថ្មី លោក Frank Lampard នឹងមិនមើលរំលងនោះឡើយ ហើយប្រាកដជានឹងអាចជាប់ជម្រើសដំបូងជាប់លាប់ជាមិនខាន។ បច្ចុប្បន្ន Everton ឈរលេខ ១៦ នៅតារាង PL អ៊ីចឹងហើយបើវត្តមាន Van de Beek អាចជួយក្រុមស្ករគ្រាប់ខៀវ ឲ្យលោតមកចូល Top 10 នោះក៏រាប់បាន ជាជោគជ័យធំមួយដែរ។
១) Anthony Martial
បន្ទាប់ពីគ្រូថ្មី Rangnick មកដឹកនាំ ភាពរកាំរកូសរវាងគ្រូសិស្សក៏កើតមានឡើង ដល់ថ្នាក់បង្ខំចិត្តឲ្យ កីឡាករបារាំង Martial ជ្រើសរើសផ្លូវបែក ហើយមកចាប់យកឱកាសថ្មី នៅក្លឹប Sevilla។
ជាមួយការលេងនៅតំណែងប្រយុទ្ធកណ្ដាល គេជឿថា Martial ប្រាកដណាស់ នឹងទទួលបានឱកាសច្រើនជាមួយក្លឹបអេស្ប៉ាញ ដូច្នេះហើយបើគេខិតខំលេង ក៏ដូចជាអាចបង្ហាញផ្លែផ្កាជោគជ័យ នោះរដូវកាលបន្ទាប់ នៅការវិលត្រលប់មកក្លឹបអាណាព្យាបាល Man Utd ១០០ ភាគរយ គេនឹងទទួលបានពេលវេលាជាប់លាប់ដូចមុនសារជាថ្មី។ រំឭកថា ស្ថិតិបង្ហាញខ្លួន ២៦៩ ប្រកួត កីឡាករវ័យ ២៦ ឆ្នាំ រកបាន ៧៩ គ្រាប់និង Assist ៥០ លើកឲ្យក្លឹបម្ចាស់ដី Old Trafford៕
ប្រភព៖ បរទេស