ខ្សែប្រយុទ្ធ Pierre-Emerick Aubameyang បាននិយាយថាការចាកចេញរបស់ខ្លួនពីក្រុម Arsenal ទៅលេងឱ្យក្រុម FC Barcelona ក៏ព្រោះតែមានបញ្ហាជាមួយអ្នកចាត់ការ Mikel Arteta ។
Aubameyangបានបង្ហាញខ្លួនជាផ្លូវការជាមួយក្រុម FC Barcelona កាលពីម្សិលមិញ បន្ទាប់ពីបញ្ចប់កិច្ចព្រមព្រៀង។ ការទៅលេងនៅក្រុមអ្នកមានបុណ្យនេះគឺ Aubameyang មិនបានតម្លៃផ្ទេរឡើយ ព្រោះរូបគេនិងក្លឹប Arsenal បានព្រមព្រៀងបញ្ចប់កុងត្រាទៅហើយកាលពីខែធ្នូចុងឆ្នាំ២០២១កន្លងទៅ ពោលគឺ Arsenal ឱ្យគេចេញដោយ Free តែម្ដង។
ការចាកចេញរបស់អតីតកីឡាករ Dortmund ខាងលើនេះដែរ ត្រូវបានសាមីខ្លួនបកស្រាយថារូបគេមានបញ្ហានៅក្លឹប ជាពិសេសជាមួយអ្នកចាត់ការ Mikel Arteta តែម្ដង។ រឿងលម្អិត សាមីខ្លួនសុំមិននិយាយច្រើនទេ តែអ្វីដែលច្បាស់សម្រាប់អ្នកគាំទ្រនោះ គឺគេចេញដោយសារមានបញ្ហាជាមួយអ្នកចាត់ការ Arteta ។ អ្នកចាត់ការក្រុម Arsenal រូបនេះ មិនសប្បាយចិត្តជាមួយគេទេ នៅប៉ុន្មានខែចុងក្រោយ។ ដូច្នេះការចែកផ្លូវគ្នាគឺជាជម្រើសល្អបំផុត៕ ប្រភព៖ DailyMail