អតីតប្រធានក្លឹប Barcelona ដែលឈរឈ្មោះចន្លោះឆ្នាំ ២០០០ ដល់ ២០០៣ គឺលោក Joan Gaspart បានទម្លាយកាលពីពេលថ្មីៗនេះ ថាក្លឹប Real Madrid ច្បាស់ណាស់ គឺសម្រេចការចុះហត្ថលេខាយក Kylian Mbappe បានហើយ គ្រាន់តែមិនទាន់ប្រកាសផ្លូវការ។ រំឭកបន្តិច កីឡាករវ័យ ២៣ ឆ្នាំ គេសល់កុងត្រាដល់ចុងខែមិថុនា ឆ្នាំ ២០២២ តែចន្លោះពេលនេះ ដល់បញ្ចប់រដូវកាលគេមានសិទ្ធ អាចចរចានិងសម្រេចជាលក្ខណៈ Pre-Contract រវាងភាគីក្លឹបដទៃបាន។
លោក Gaspart និយាយ៖ “ខ្ញុំសុំទម្លាយរឿងមួយទៅចុះ គឺ Kylian គេបានចុះហត្ថលេខារួចរាល់ហើយឲ្យ Real Madrid រឿងហ្នឹងខ្ញុំច្បាស់ណាស់ ព្រោះអីខ្ញុំស្គាល់ Florentino [ប្រធានក្លឹប Real Madrid] ច្បាស់”។ បន្ថែមពីរឿង Mbappe បុរសវ័យ ៧៧ ឆ្នាំខាងលើ ក៏ឆ្លៀតសង្កត់ធ្ងន់ដល់រឿង Barcelona ថាមិនគួររក្សាទុក Ousmane Dembele នោះទេ បើទុកគេហើយមិនប្រើប្រាស់គេលើទីលានផងនោះ។
គួរឲ្យដឹងថា Mbappe ក៏លេចលឺ អាចទទួលបានថ្លៃពលកម្មកប់ពពកដល់ទៅ ៥០ លានអឺរ៉ូ/ឆ្នាំឯណោះពីអធិរាជស។ ទាក់ទងនឹងថ្លៃពលកម្មក្រាស់ក្រែល វាក៏អាចជាមូលហេតុដែលកីឡាករសម្រេចចិត្តអូសបន្លាយពេលដល់ផុតកុងត្រាផងដែរ ព្រោះជាការពិត ប្រសិនការផ្ទេរចូល ស្ថិតនៅលក្ខខណ្ឌឥតតម្លៃខ្លួន នោះក្លឹបនឹងអាចបង្វែរលុយពីការចំណាយលើតម្លៃផ្ទេរ មកប៉ះប៉ូវឲ្យថ្លៃពលកម្មសម្រាប់កីឡាករជំនួសវិញបាន៕
ប្រភព៖ Sportskeeda