បាល់ទាត់គឺជាកីឡាដ៏ពេញនិយមមួយ ដែលមានមនុស្សរាប់រយលាននាក់នៅទូទាំងសកលលោក រមែងចូលចិត្តទស្សនា ហេតុនេះកីឡាករមានទេពកោសល្យ គុណភាពពិតប្រាកដ ក៏ងាយនឹងមានឱកាសក្លាយជាបុគ្គលល្បីល្បាញផងដែរ។
តែយ៉ាងណាអាជីពរបស់ពួកគេក៏ងាយនឹងធ្លាក់ចុះទៅវិញ ត្រឹមមួយពព្រិចភ្នែក ជាក់ស្ដែងដូចកីឡាករទាំង ៣ រូបនេះ ខិតខំសាងកេរឈ្មោះរាប់ឆ្នាំ ចុងក្រោយមកបង្កកំហុសធំនៅប្រកួតទោល ជាហេតុនាំឲ្យកប់ឈ្មោះ ខ្លះសឹងតែបាត់មុខពីពិភពបាល់ទាត់៖
៣) David Luiz
អាចនិយាយថា Luiz គឺជាខ្សែការពារដ៏ល្អដាច់គេមួយ នៅកំឡុងឆ្នាំ ២០១១ ដល់ ២០១៣ ព្រោះអីការលេងឲ្យតោខៀវ Chelsea គេគឺជាចំណែកសំខាន់ជួយក្លឹបលើកពានរង្វាន់ FA Cup និង Champions League។
តែយ៉ាងណាឈានមកដល់ការប្រកួត នៅឆ្នាំ ២០១៤ នៃព្រឹត្តិការណ៍ FIFA World Cup ដែលប្រេស៊ីលត្រូវប៉ះអាល្លឺម៉ង់ នាវគ្គ ៤ ក្រុមចុងក្រោយ គឺ Luiz បានទទួលងារជាប្រធានក្រុម ជំនួសអវត្តមាន Thiago Silva។ ប៉ុន្តែការលេង ៩០ នាទីសារនោះ ក៏បានក្លាយជាថ្ងៃដែលខ្សែការពារខាងលើចងចាំបំផុត និងដល់ថ្នាក់ពោលពាក្យក្រោយចប់ការប្រកួត ថាជាថ្ងៃដ៏អាក្រក់បំផុតក្នុងអាជីពរបស់ខ្លួន។
លទ្ធផលគឺ អាល្លឺម៉ង់យកឈ្នះ ៧-១ ហើយ កំហុសភាគច្រើន បានកើតឡើងចេញពីការធ្វេសប្រហែសរបស់ David Luiz នៅតំបន់ការពារកណ្តាល។
២) Jonathan Woodgate
អតីតគ្រូជម្រើសជាតិអង់គ្លេស លោក Bobby Robson ធ្លាប់បាននិយាយថា Woodgate គឺជាខ្សែការពារកណ្តាលល្អបំផុតមួយ ក្នុងចំណោមអ្នកទាំងបួននៅប្រវត្តិសាស្រ្ត Premier League មាន Sol Campbell, Rio Ferdinand និង Gareth Soutgate។
តែយ៉ាងណាក្រោយការផ្ទេរចេញពីក្លឹបNewcastle ទៅកាន់ R.Madrid នៅឆ្នាំ ២០០៤ នោះក៏ជាពេលដែលនាំឲ្យភាពល្បីល្បាញរបស់គេ ត្រូវកប់ចោលផងដែរ។ បន្ទាប់ពីផ្ទេរទៅអធិរាជស គេបានសម្រាកជាច្រើនខែក្រោយជួបបញ្ហារបួស ហើយមកដល់ប្រកួតទល់ Athletic Bilbao ដែលជាប្រកួតបង្ហាញខ្លួនលើកដំបូង គេបែរជាបង្កើតរឿងហួសចិត្តទៅវិញ។
នៅប្រកួតនោះ ដ្បិត Real Madrid យកឈ្នះ ៣-១ តែមួយគ្រាប់របស់ Bilbao គឺជាបាល់ Own Goal កើតចេញពីកំហុសរបស់ Woodgate នោះឯង។ មិនត្រឹមតែប៉ុណ្ណោះចូលដល់តង់ទី ២ គេថែមទាំងរងពិន័យកាតក្រហមថែមទៀត។ ក្រោយមក ពេលវេលារបស់គេជាមួយ Real ក៏នៅមិនបានយូរនោះដែរ ដោយត្រឹមតែការឈរជើង ១៤ ប្រកួត Woodgate ក៏ត្រូវបានក្លឹបអេស្ប៉ាញ លក់ទៅឲ្យក្លឹបនៅអង់គ្លេសគឺ Middlebrough ហើយស្ងាត់ឈ្មោះពីពេលនោះរហូតមក។
១) Loris Karius
២៦ ឧសភា ឆ្នាំ ២០១៨ គឺជាថ្ងៃដែល Karius គួរតែចងចាំបំផុត ហើយក៏ជាថ្ងៃដែលអ្នកគាំទ្រ Liverpool មានការខឹងសម្បាទៅលើអ្នកចាំទីរូបនោះខ្លាំងផងដែរ។ លទ្ធផលបរាជ័យ ៣-១ គឺមាន ២ គ្រាប់កើតចេញពីកំហុសរបស់អ្នកចាំទីសញ្ជាតិអាល្លឺម៉ង់។
គ្រាប់បាល់ដំបូងដែល Karim Benzema ធ្វើបាន គឺការរត់ទៅឆ្មក់យកបាល់ ដែល Karius គប់បាល់ទៅមិត្តរួមក្រុមមិនបានល្អ ហើយនាំឲ្យបាល់ឡងចូលទី។ រីឯកំហុសធំមួយទៀត គឺការចាប់បាល់ក្រឡក ដែល Bale ស៊ុតនៅចម្ងាយជិត ៣០ ម៉ែត្រ និយាយទៅ គេលេងដូចភ័យៗ អារម្មណ៍មិននៅនឹងខ្លួន ទាំងដែលនេះ គឺវាជាវគ្គផ្តាច់ព្រ័ត្រ ពានរង្វាន់ប្រចាំតំបន់អឺរ៉ុប។
ក្រោយការបង្កកំហុសនៅឆ្នាំ ២០១៨ នោះហើយ Karius ក៏លែងមានឱកាសបង្ហាញខ្លួនជាប់លាប់តទៅទៀត ហើយត្រូវបាន Liverpool សម្រេចដាក់ឲ្យខ្ចីជើងជាបន្តបន្ទាប់ អស់ពីទៅក្លឹប Besiktas ឥឡូវទៅក្លឹប Union Berlin ហើយក៏មិនរំពឹងនឹងអាចមកប្រជែងតំណែងដៃទីមួយពី Alisson បានដែរ៕
ប្រភព៖ បរទេស