ក្លឹបយក្សបារាំង PSG នៅបន្ដចាប់អារម្មណ៍លើខ្សែប្រយុទ្ធ Marcus Rashford ដដែល ដើម្បីត្រៀមជំនួសកន្លែងរបស់ Kylian Mbappe ប្រសិនបើគេចេញនៅចប់រដូវកាលនេះ។
ប្រភពនៅបារាំងបានអះអាងថាក្រុម PSG បានត្រៀមជើងព្រួលរូចទៅហើយ ប្រសិនបើក្រុមមួយនេះមិនអាចរក្សាកីឡាករ Mbappe បាន។ ដោយពួកគេបានស្វែងរកខ្សែប្រយុទ្ធវ័យក្មេងថ្មី ក្នុងនោះគឺកីឡាករ Rashford របស់ក្រុមបិសាចក្រហម Manchester United ជាជម្រើសមួយផងដែរ។ កីឡាករវ័យ២៤ឆ្នាំនេះ ត្រូវបានក្រុម PSG ទាក់ទងតាំងពីរដូវកាលមុនម្ល៉េះតែមិនទទួលបានជោគជ័យឡើយ។ រហូតមកដល់ពេលនេះ ពួកគេនៅតែបន្ដចិត្តចង់បានកីឡាករវ័យក្មេងរបស់អង់គ្លេសដដែល។
សូមបញ្ជាក់ថា Mbappe នៅសល់កុងត្រាជាមួយក្រុម PSG ត្រឹមរដូវកាលនេះទេ ខណៈដែលកុងត្រាថ្មីណាមួយនោះក៏មិនទាន់ឃើញកើតមាននៅឡើយដែរ។ រហូតមកដល់ពេលនេះ ក្រុម Real Madrid បានទាក់ទងជាប់ជានិច្ចជាមួយកីឡាករបារាំង ដើម្បីធ្វើយ៉ាងណាយកគេពីក្រុម PSG ឱ្យបាន។ កត្ដានេះហើយ ទើបក្រុម PSG ត្រូវត្រៀមទុកមុនសម្រាប់កីឡាករមកជំនួស៕ ប្រភព៖ DAILYMAIL
