ក្លឹបអង់គ្លេស Man Utd ត្រូវបានគេរាយការណ៍ថា កំពុងចាប់អារម្មណ៍លើសមត្ថភាពដឹកនាំនៃគ្រូជម្រើសជាតិអ៊ីតាលី លោក Roberto Mancini ដោយរំពឹងចង់បានវត្តមានរបស់លោកមកកាន់ទឹកដី Old Trafford នៅចុងឆ្នាំ ២០២២ ពោលក្រោយចប់ព្រឹត្តិការណ៍ World Cup។
បុរសវ័យ ៥៧ ឆ្នាំកំពុងត្រៀមខ្លួន តតាំងវគ្គជម្រុះបឋម Playoff ដែលត្រូវលេងប៉ះម៉ាសេដូនីនាខែមិនាខាងមុខ មុនទៅសម្រេចយកឱកាសឡើងឬធ្លាក់ ជាមួយការតទល់រវាងទួរគី ឬព័រទុយហ្គាល់។ តែយ៉ាងណាកន្លងមក Mancini បានបង្កើតសមិទ្ធផលជោគជ័យធំរួចមកហើយ តាមរយៈការជួយអ៊ីតាលីលើកពាន Euro 2020។
បើតាមអ្នករាយការណ៍លោក Fabrizio Romano បានឲ្យដឹងថា អតីតគ្រូនៃក្លឹប Man City ក៏គិតចង់វិលត្រលប់មកដឹកនាំក្លឹបនៅ Premier League សារជាថ្មីផងដែរ តែនឹងគិតនៅពេលបន្ទាប់ទៀត ព្រោះអីកំពុងមមាញឹកជាមួយការលេងវគ្គជម្រុះបឋម World Cup។ តែយ៉ាងណាក្នុងការគិតនោះ ក៏អាចជាមានជម្រើសក្លឹប Man Utd ផងដែរ ព្រោះអីក្លឹបចាស់ City មិនរំពឹងនឹងមានកន្លែងទំនេរសម្រាប់លោកឡើយ។
គួរបញ្ជាក់ថា Mancini ក៏ធ្លាប់ស្គាល់រសជាតិលើកពាន Premier League ផងដែរ កាលពីរដូវកាល ២០១១/១២ ជាមួយ City ហើយក្លឹបចុងក្រោយ ដែលលោកឈរជើងដឹកនាំ គឺ Zenit St Petersburg នៅឯប្រទេសរុស្ស៊ី៕
ប្រភព៖ Fabrizio Romano