ក្រុមជម្រើសជាតិម៉ារ៉ុកបានយកឈ្នះ នៅលទ្ធផល ២-១ ទៅលើម៉ាឡាវី ដែលសម្រេចឲ្យពួកគេអាចឡើងទៅកាន់វគ្គបន្ត ៨ ក្រុមចុងក្រោយនៃពានរង្វាន់ Africa Cup of Nations។ នេះក៏អរគុណជាពិសេសដល់គ្រាប់បាល់នៅនាទី ៧០ ធ្វើបានដោយ Achraf Hakimi ជាការស៊ុត Free-Kick នៅរយៈចម្ងាយជាង ៣០ ម៉ែត្រ។
ក្រោយសម្រេចទីដ៏ល្អសារនេះ ខ្សែការពារស្លាបនៃក្លឹប PSG ក៏បានចេញមកអះអាងថា នៅពេលវិលត្រលប់ទៅលេងឲ្យក្លឹបវិញ ខ្លួននឹងសាកសួរកីឡាករ Kylian Mbappe, Neymar និង Lionel Messi អំពីការផ្ទេរតំណែងកីឡាករដែលត្រូវចាត់ចែងបាល់ Set-piece បន្ទាប់ពីខ្លួនបានបង្ហាញគុណភាពដ៏អស្ចារ្យកាលពីយប់មិញ។
ការ Set-piece គឺសំដៅដល់កីឡាករដែលត្រូវរ៉ាប់រងតួនាទី អ្នកលើកបាល់ Free-Kick បាល់ Corner ក៏ដូចជាបាល់ដែលទទួលបានពីការពិន័យទៅលើកីឡាករក្រុមបដិបក្ខ។ Hakimi និយាយ៖”នៅប៉ារីសមានកីឡាករជាច្រើនដែលអាចស៊ុត Free-Kick តួយ៉ាងគឺ Messi, Neymar និង Mbappe ដូច្នេះវាជារឿងពិបាក តែខ្ញុំនឹងព្យាយាមទៅនិយាយជាមួយពួកគាត់ ពេលត្រលប់ទៅវិញ ដោយពេលនេះខ្ញុំបន្តផ្តោតការលេងឲ្យជម្រើសជាតិសិន ហើយបន្ទាប់មកយើងនឹងបានឃើញពីរឿងរ៉ាវនៅទីក្រុងប៉ារីស”៕
ប្រភព៖ Sportskeeda