ពេលវេលានៃទីផ្សារដោះដូររដូវរងា សេសសល់មិនដល់ ១ សប្តាហ៍ទៀតនោះទេ នឹងត្រូវបិទទ្វារហើយ ដែលពេលវេលានេះសំខាន់ណាស់ សម្រាប់កីឡាករមួយចំនួន ជាពិសេសអ្នកដែលត្រូវផុតកុងត្រានាចុងខែមិថុនាខាងមុខ។ ក្លឹបអាចលក់ពួកគេចេញ ជាជាងទុកចោលដល់អស់តម្លៃខ្លួន ហើយកីឡាករខ្លះ ក្រោយមិនសូវបានលេង ក៏គិតចង់ទៅក្លឹបថ្មី ដើម្បីបានឱកាសលេង ជាជាងឈរជើងទំនេរ ព្រោះនាំឲ្យឱកាសទៅលេងនៅ World Cup សម្រាប់ពួកគេ អាចមានភាគរយទាប។
ងាកមកមើលក្លឹប Man Utd ឯណេះ មានចចាមអារ៉ាមជុំវិញការចាកចេញរបស់កីឡាករជាច្រើន តួយ៉ាងគឺ Anthony Martial, Jesse Lingard, Dean Henderson, Juan Mata និង Donny van de Beek ជាដើម តែយ៉ាងណាមិនទាន់មាននរណាម្នាក់ សម្រេចផ្លូវការនៅឡើយ។
បើតាមការបញ្ជាក់ពីលោក Ralf Rangnick ជាអ្នកចាត់ការក្លឹប ក៏បាននិយាយ៖ “ខ្ញុំអត់ដឹងបែបម៉េចទេ គ្រាន់ថារឿងកីឡាករណាចង់ចាកចេញ គឺខ្ញុំដឹងច្បាស់ ខ្ញុំក៏ដឹងថាមានការចរចារវាងភាគីក្លឹបផងដែរ តែខ្ញុំសុំមិនលូកដៃអ្វីទាំងអស់”។
លោកបន្ត៖ “ខ្ញុំធ្វើបែបនេះ ដើម្បីបញ្ចៀសមានរឿងអ្វីកើតឡើងនៅពេលបន្ទាប់ ដូច្នេះយើងមានតែរង់ចាំមើល ថានឹងមានរឿងអ្វីកើតឡើង”។ បញ្ជាក់ថា Man Utd កំពុងឈរចំណាត់ថ្នាក់ទី ៤ នៅ PL ដោយមាន ៣៨ ពិន្ទុ៕
ប្រភព៖ Sportsmole