ទីផ្សារដោះដូររដូវរងា នៅសេសសល់តែរយៈពេលមិនដល់ ១ សប្តាហ៍ទៀតនោះទេ ដោយយើងក៏បានឃើញក្លឹបមួយចំនួន បានសម្រេចការនាំយក និងលក់ចេញកីឡាករជាបណ្តើរៗហើយដែរ។ តែយ៉ាងណាងាកមកមើលក្លឹបមាន់ខ្នាយមាស Tottenham Hotspur ឯណេះ ហាក់កំពុងពន្លឿនល្បឿន ជុំវិញការចង់លក់ចេញកីឡាករ Dele Alli និង Giovani Lo Celso។
បើតាមសារព័ត៌មាន Goal ចុះផ្សាយថា ក្លឹបបានដាក់ឈ្មោះអ្នកទាំងពីរ ទៅក្នុងបញ្ជីកីឡាករត្រូវវ៉ៃចេញ ដោយរង់ចាំតែសំណើណាមួយធ្លាក់មកតែប៉ុណ្ណោះ។ បញ្ជាក់ឲ្យដឹង Alli គេមិនសូវបានលេងជាប់លាប់ដូចមុនទេ ក្រោមការដឹកនាំដោយគ្រូថ្មី លោក Antonio Conte រីឯ Lo Celso របួសច្រើនពេក នៅរដូវកាល ២០២១/២២។
ទន្ទឹមនឹងការលក់ចេញនេះដែរ ក្លឹបក៏រំពឹងយកចំណូលដែលទទួលបាន ទៅប៉ះប៉ូវការនាំអ្នកថ្មី មកពង្រឹងប្រព័ន្ធលេងវិញ ក៏ដូចជាបន្តគោលដៅប្រជែងយកកៅអី សម្រាប់លេង Champions League រដូវកាលក្រោយ។ គិតត្រឹមជុំទី ២០ Spurs ឈរលេខ ៧ មាន ៣៦ ពិន្ទុ ចាញ់ ២ ពិន្ទុប៉ុណ្ណោះ ធៀបនឹងក្រុម Top 4 ហើយនៅពីក្រោយ ២ ប្រកួត៕
ប្រភព៖ Goal